काठमाडौँ । नेपालगन्ज दिल्ली सिधा हवाई उडानलाई प्रधानमन्त्रीको भारत भ्रमणमा एजेण्डा बनाउन माग गर्दै काठमाडौं पुगेको प्रतिनिधि मण्डलले प्रधानमन्त्री केपी शर्मा ओलीलाई भेटेर सो सम्बन्धमा ध्यानाकर्षण गराएका छन् ।
कर्णाली प्रदेश र लुम्बिनी प्रदेशका मुख्यमन्त्रीहरु सहित त्यस क्षेत्रका जनप्रतिनिधिहरुको एक्यबद्धता सहित प्रधानमन्त्री ओलीलाई भेटेका प्रतिनिधि मण्डलका सदस्यहरुले नेपालगञ्ज–नयाँदिल्ली सिधा हवाई उडानका लागि ध्यानाकर्षण गराइएका हुन् ।
प्रधानमन्त्री निवास, बालुवाटारमा भएको भेटमा उनीहरुले नेपाल सरकारकै लगानीमा नेपालगन्ज विमानस्थलमा आवश्यक पूर्वाधार विकास भइसकेको जानकारी गराउँदै नेपालगन्ज दिल्ली सिधा हवाई उडानले पश्चिम नेपालको ३२ जिल्लाको हवाई सुविधा र व्यावसायिक श्रीवृद्धिमा टेवा पुग्ने जनाए । उनीहरुले नेपालगन्ज्–नयाँ दिल्ली सिधा हवाई सेवा सञ्चालनको विषयलाई प्रधानमन्त्रीको भारत भ्रमणको एजेण्डा बनाउन प्रधानमन्त्री समक्ष आग्रह गरे ।
भेटका अवसरमा प्रतिनिधि मण्डलले लुम्बिनी, कर्णाली र सुदुपश्चिमका साँसदहरु, स्थानीयतहका प्रमुखहरु, उद्यागी व्यवसायीहरुसहित बिज्ञहरुबाट प्राप्त सुझावका आधारमा तयार पारिएको प्रतिबेदन सहितको मागपत्र प्रधानमन्त्री ओलीलाई बुझाएका थिए । टोलीका संयोजक तथा नेपालगन्ज उद्योग वाणिज्य संघका अध्यक्ष टंक बहादुर धामीले मागपत्र प्रधानमन्त्रीलाई बझाएका थिए ।
मागपत्र बुझ्दै प्रधानमन्त्री ओलीले आफू यसका लागि सकारात्मक रहेको र भारत सरकारसँग छलफल गरिने विश्वास दिलाए । उनले नेपालगन्ज विमानस्थलको धावनमार्ग थप विस्तार र जमिन संरक्षणलगायतका काममा पनि स्थानीय अगुवाहरुलाई चासो दिन आग्रह गरे ।
प्रतिनिधि मण्डलले आजै परराष्ट्रमन्त्री आरजु राणा देउवा र पर्यटन मन्त्री बद्री प्रसाद पाण्डेलाई भेटेर प्रधानमन्त्रीको भारत भ्रमणमा नेपालगन्ज दिल्ली सिधा हवाई उडानलाई एजेण्डा बनाउन पहल गरिदिन आग्रह गरेको थियो ।
प्रतिक्रिया