रूपन्देही-३ उपनिर्वाचनका लागि २६ दल दर्ता

काठमाडौं । रूपन्देही निर्वाचन क्षेत्र नम्बर-३ मा कात्तिक १७ गते हुने उपनिर्वाचनका लागि २६ राजनीतिक दल दर्ता भएका छन् । निर्वाचन आयोगले सोमबार दल दर्ताको निर्णय गरेको हो ।

निर्वाचन आयोगका अनुसार साउन २१ देखि २७ गतेसम्म तोकिएको समयावधिभित्र २७ दलले निवेदन दिएका थिए । तीमध्ये कानुनी प्रक्रिया पूरा भएका २६ दललाई दर्ता गर्ने निर्णय गरिएको हो ।

यसअघि आयोगले उपनिर्वाचनका लागि कार्यतालिका स्वीकृत गरिसकेको छ । सोअनुसार असोज २१ गते बिहान १० देखि साँझ ५ बजेसम्म निर्वाचन अधिकृतको कार्यालयमा उम्मेदवारको मनोनयन पत्र दर्ता हुनेछ । सोही दिन साँझ उम्मेदवारको प्रारम्भिक सूची प्रकाशित गरिनेछ भने असोज २४ गते अन्तिम नामावली सार्वजनिक हुनेछ ।

मतदान कात्तिक १७ गते बिहान ७ बजेदेखि अपराह्न ५ बजेसम्म तोकिएका मतदान केन्द्रमा हुने आयोगले जनाएको छ ।