रवि भेट्न नख्खु कारागार जाँदै प्रचण्ड

काठमाडौं । प्रमुख प्रतिपक्षी दलका नेता एवं नेकपा (माओवादी केन्द्र)का अध्यक्ष तथा प्रतिपक्षी दलका नेता पुष्पकमल दाहाल ‘प्रचण्ड’ बुधबार राष्ट्रिय स्वतन्त्र पार्टीका सभापति रवि लामिछानेलाई भेट्न नख्खु कारागार जाने भएका छन्।

प्रचण्ड आज साँझ ६ बजे कारागार पुग्ने कार्यक्रम तय भएको रास्वपाका प्रवक्ता मनिष झाले जानकारी दिएका छन् ।

सहकारी ठगी प्रकरणमा पुर्पक्षका लागि लामिछाने नख्खु कारागारमा रहेका छन्। उनलाई राजनीतिक प्रतिशोधका कारण सरकारले जालझेल गरेर थुनामा राखेको रास्वपासहितका प्रतिपक्षी दलहरुले आरोप लगाउँदै आएका छन् ।

लामिछाने यसअघि रूपन्देही कारागारमा थिए । उनलाई गत शनिबार मात्र नख्खु स्थानान्तरण गरिएको थियो ।