रुपन्देही । छत्रगञ्ज रुपन्देही सम्पर्क समाजको समन्वय तथा सहजीकरणमा छत्रदेव गाउँपालिका-५ नं. वडा कार्यालयले दुई दिने एकीकृत शिविर सम्पन्न गरेको छ ।
सिद्धार्थ इन्टरनेशनल कलेज, मिलनचोक बुटवलमा आयोजित शिविरमार्फत सामाजिक सुरक्षा भत्ता प्राप्त गर्ने जेष्ठ नागरिक, दलित जेष्ठ नागरिक, जेष्ठ नागरिक एकल महिला, असहाय एकल महिला, पूर्ण अपाङ्गता, अतिअशक्त अपाङ्गता तथा बालबालिकाको बालपोषण भत्ताका सूचीकृत लाभग्राहीलाई आर्थिक वर्ष २०८२/०८३ को नविकरण कार्य सम्पन्न गरिएको वडाकार्यालयले जनाएको छ ।
शिविरमा छत्रदेव-५ का सम्पूर्ण लाभग्राहीले सेवा प्राप्त गर्नुका साथै छिमेकी वडाका बासिन्दाले पनि सुविधा लिएको वडाकार्यालयले जनाएको छ । कार्यक्रम समाजका सम्पूर्ण कार्यसमिति, सल्लाहकार, वडाअध्यक्ष बालकृष्ण पोखरेल, वडासचिव तथा अन्य जनप्रतिनिधिहरुको सक्रिय सहभागितामा सम्पन्न भएको थियो ।
शिविर सफलतापूर्वक सम्पन्न गर्न सहयोग गर्ने सिद्धार्थ इन्टरनेशनल कलेज, वडाकार्यालयका प्रतिनिधि, कार्यसमिति सदस्य, सल्लाहकारलगायत सम्पूर्ण सेवाग्राहीप्रति समाजका अध्यक्ष सिद्धार्थ पन्थीले विशेष धन्यवाद व्यक्त गरेका छन् ।
प्रतिक्रिया