संवैधानिक मार्गबाट शान्तिपूर्ण समाधान खोज्न सबै पक्षलाई शेखर कोइरालाको आग्रह

काठमाडौं । नेपाली कांग्रेसका नेता डा. शेखर कोइरालाले जेनजी आन्दोलनका जायज मागहरू संविधान र कानूनी प्रक्रियाभित्रै रही समाधान गर्नुपर्नेमा जोड दिएका छन्।

नेता कोइरालाले सामाजिक सञ्जालमार्फत विज्ञप्ति जारी गर्दै जेनजी पुस्ताका युवाहरुले भ्रष्टाचार र बेथितिविरुद्ध उठाएको आवाजप्रति पूर्ण समर्थन व्यक्त गरेका छन्।

आन्दोलनपछि मुलुकमा देखिएको राजनीतिक रिक्तता तत्काल भरिनुपर्ने आवश्यकता औंल्याउँदै उनले सहमति, सहकार्य र एकता कायम गरी संवैधानिक मार्गबाट शान्तिपूर्ण समाधान खोज्न सबै पक्षलाई आग्रह गरेका छन्। ‘जेनजी युवाहरूको न्यायोचित माग संविधानभित्रै रहेर समाधान गर्न सकिन्छ’, भन्दै उनले करिब ६५ वर्ष लामो संघर्ष, त्याग र बलिदानपछि संविधानसभाबाट निर्माण भएको संविधानलाई आधार बनाएर आगामी राजनीतिक यात्रा अघि बढाउन अपिल गरेका छन्।

संवैधानिक समाधानका लागि राष्ट्रपति रामचन्द्र पौडेलले चालेको पहल सराहनीय रहेको उल्लेख गर्दै कोइरालाले यसमा सबैको साथ र समर्थन रहने विश्वास व्यक्त गरेका छन्।

भदौ २३ र २४ गते भएको आन्दोलनका क्रममा ज्यान गुमाएकाप्रति श्रद्धाञ्जली अर्पण गर्दै कोइरालाले शोकसन्तप्त परिवारप्रति समवेदना प्रकट गरेका छन् भने घाइते भएका सबैको शीघ्र स्वास्थ्य लाभको कामना गरेका छन्।

नेता कोइरालाले आफ्नो पार्टीका सभापति शेरबहादुर देउवासहितका पार्टी नेता–कार्यकर्तामाथि, आन्दोलनकारी तथा सुरक्षाकर्मीमाथि भएको आक्रमणको निन्दा गरेका छन्।

कोइरालाले सरकारी तथा सार्वजनिक सम्पत्ति, सञ्चार गृह, उद्योग, व्यवसाय, कलकारखाना र निजी भवनहरूमा गरिएको तोडफोड, लुटपाट तथा व्यक्तिगत आक्रमणलाई जघन्य अपराध भन्दै घोर भत्र्सना गरेका छन्।