काठमाडौं । एशिया कप सुपर फोर अन्तर्गतको रोचक खेलमा बंगलादेशले श्रीलंकामाथि चार विकेटको नाटकीय जित हात पारेको छ । श्रीलंकाले दिएको १६९ रनको लक्ष्य बंगलादेशले एक बल बाँकी रहँदा ६ विकेटको क्षतिमा पूरा गरेको हो । अन्तिम ओभरमा दुई विकेट गुमाए पनि बंगलादेशले धैर्य प्रदर्शन गर्दै आवश्यक एक रन जोड्दै विजय हासिल गरेको छ ।
यस जितसँगै बंगलादेशले सुपर फोरमा महत्त्वपूर्ण अंक जोडेको छ भने श्रीलंकाको यात्रा भने थप कठिन बनेको छ ।
सुरुमा ब्याटिङ गरेको श्रीलंकाले २० ओभरमा ७ विकेट गुमाउँदै १६८ रन बनाएको थियो । कप्तान दासुन शानाकाले उत्कृष्ट प्रदर्शन गर्दै ३७ बलमा ६४ रनको नटआउट अर्धशतक प्रहार गरे । तर अन्य ब्याट्सम्यानहरूबाट उल्लेख्य योगदान नआएपछि श्रीलंकाले ठूलो स्कोर बनाउन सकेन ।
बलिङतर्फ बंगलादेशका मुस्ताफिजुर रहमान घातक बने । उनले चार ओभरमा मात्र २० रन खर्चेर तीन विकेट लिएका थिए । साथै माहीदी हसनले पनि दुई विकेट हात पारे ।
१६९ रनको लक्ष्य पछ्याउँदै मैदानमा उत्रिएको बंगलादेशका लागि सैफ हसन र तौहिद हृदयोले शानदार अर्धशतक बनाए । हसनले ४५ बलमा ६१ रन प्रहार गरे भने हृदयोलाई रोक्न श्रीलंकाली बलर असफल भए, उनले ३७ बलमा ५८ रन जोडे । लिटन दासले पनि २३ रनको योगदान दिए ।
यो जितसँगै बंगलादेशले सुपर फोरमा आफ्नो अभियानलाई बलियो बनाएको छ भने श्रीलंकाले अब पाकिस्तान र भारतजस्ता शक्तिशाली टिमसँग खेल्नुपर्ने भएकाले दबाब झनै बढेको छ ।
सुपर फोर अन्तर्गत आज राति भारत र पाकिस्तानबीच बहुप्रतिक्षित भिडन्त हुने तय भएको छ ।
प्रतिक्रिया