काठमाडौं । एसिया कप क्रिकेटको सुपर फोरमा भारतले पाकिस्तानलाई ६ विकेटले पराजित गरेको छ । गएराति संयुक्त अरब इमिरेट्स (यूएई) मा सम्पन्न खेलमा पाकिस्तानले दिएको १७२ रनको लक्ष्य भारतले ७ बल बाँकी रहँदा ४ विकेटको क्षतिमा पूरा गरेको हो ।
यसअघि समूह चरणको खेलमै पाकिस्तानलाई हराएको भारतले सुपर फोरमा पनि दोस्रो पटक विजयी नतिजा निकाल्दै दुई अंक जोडेको छ ।
भारतका लागि अभिषेक शर्माले शानदार अर्धशतक प्रहार गर्दै ३९ बलमा ६ चौका र ५ छक्कासहित ७४ रन बनाए । शुभमन गिलले ४७, तिलक बर्माले ३० र सञ्जु श्यामसनले १३ रनको योगदान दिए । पाकिस्तानका बलरहरूमध्ये हरिस राउफले २ विकेट, अब्राहम र फहम आस्रफले एक-एक विकेट लिए ।
यसअघि टस हारेर पहिले ब्याटिङ गरेको पाकिस्तानले पुरै २० ओभर खेल्दै ५ विकेटको क्षतिमा १७१ रन बनाएको थियो । पाकिस्तानका लागि साहिबजादा फरहानले ५८ रनको अर्धशतक प्रहार गरे भने सायम अउब र मोहमद नवाजले समान २१-२१ रन जोडे ।
भारतको बलिङमा शिभम दुवेले २ विकेट, कुलदीप यादव र हार्दिक पाण्ड्याले एक-एक विकेट लिए भने जसप्रित बुम्राह विकेटबिहीन भए ।
यसअघि भएको सुपर फोरको अर्को खेलमा बंगलादेशले श्रीलंकालाई हराउँदै दुई अंक जोडिसकेको छ ।
प्रतिक्रिया