काठमाडौं । नेपाली महिला राष्ट्रिय क्रिकेट टोलीले मलेसियाविरुद्धको पाँचौं तथा अन्तिम टी-२० खेल आज खेल्दैछ । सिरिजमा दुवै टोलीले दुई-दुई खेल जितेका कारण आजको खेल निर्णायक बनेको छ ।
मलेसियाले टस जितेर पहिले ब्याटिङ रोजेपछि नेपालले अहिले बलिङ गर्दैछ । यस खेललाई सिरिजको “फाइनल” मानिएको छ, किनभने आज जित्ने टोलीले सिरिजको उपाधि हात पार्नेछ ।
नेपालको प्लेइङ-११ मा कप्तान इन्दु बर्मा र उपकप्तान पुजा महतोसहित रुबिना क्षेत्री, राजमती ऐरी, सम्झना खड्का, कविता जोशी, रिया शर्मा, रचना चौधरी, रुबी पोद्दार, कविता कुँवर र सुमन बिष्ट रहेका छन् ।
नेपालले यसअघि सिरिजमा उत्कृष्ट प्रदर्शन गर्दै दुई खेलमा जित हासिल गरेको थियो भने मलेसियाले पनि समान संख्या खेलमा विजयी हुँदै प्रतिस्पर्धा बराबरीमा ल्याएको हो ।
आजको भिडन्तमा दुवै टोलीले आक्रामक रणनीति अपनाउने अनुमान गरिएको छ। नेपालले बलिङमा सुरुवात राम्रो गरे जित आफ्नो पक्षमा पार्ने सम्भावना बलियो रहेको छ ।
प्रतिक्रिया