काठमाडौं । टी-२० महिला क्रिकेट सिरिजको फाइनल खेलमा मलेसियाले नेपाललाई १०४ रनको लक्ष्य प्रस्तुत गरेको छ ।
बुधबार बिहान मलेसियाको घरेलु मैदान वायुमास ओभलमा टस जितेर पहिले ब्याटिङ रोजेको मलेसियाले निर्धारित २० ओभरमा ६ विकेटको क्षतिमा १०३ रनको योगफल तयार गर्यो ।
मलेसियाका लागि विन्डर डानिया टोलीका शीर्ष स्कोरर बनिन् । उनले ४० रनको योगदान दिइन् भने माहिरा इज्जाइले १९ रन बनाइन् ।
नेपालका बलरहरूले उत्कृष्ट प्रदर्शन गर्दै मलेसियालाई सस्तैमा रोक्न सफल भए । राजमती ऐरीले तीन विकेट लिएर मलेसियाको ब्याटिङ लाइनअपलाई दबाबमा पारिन् । उनले तीन ओभर बलिङ गर्दै १५ रन मात्र खर्चिन् । त्यस्तै, कविता कुँवरले चार ओभरमा १६ रन खर्चेर दुई विकेट हात पारिन् । अर्का बलर रचनाकुमारी चौधरीले एक विकेट लिएर मलेसियाको पारी समेट्न सहयोग गरिन् ।
अब नेपालले सिरिज जित्नका लागि १०४ रनको लक्ष्य पछ्याउँदै जवाफी ब्याटिङ सुरु गरिसकेको छ ।
आजको खेल निर्णायक भएकाले जसले जित्नेछ, उसैले टी-२० सिरिजको उपाधि हात पार्नेछ ।
प्रतिक्रिया