काठमाडौं । नेपाल अन्तर्राष्ट्रिय क्रिकेट काउन्सिल (आईसीसी) टी-२० अन्तर्राष्ट्रिय वरीयतामा एक स्थान उक्लिएको छ । मंगलबार सार्वजनिक गरिएको नयाँ वरीयतामा नेपाल १७औँ स्थानमा पुगेको हो ।
हालै सम्पन्न वेस्ट इन्डिजविरुद्धको टी-२० शृंखला जितेपछि नेपालले वरीयतामा उक्लन सफल भएको हो । लगातार उत्कृष्ट प्रदर्शनसँगै नेपाली टिमले टी-२० फर्म्याटमा विश्व क्रिकेटमा आफ्नो स्थान मजबुत बनाउँदै लगेको छ ।
आईसीसीद्वारा जारी नयाँ तालिकामा भारत शीर्ष स्थानमा यथावत् रहेको छ भने पाकिस्तान, श्रीलंका, बंगलादेश र अफगानिस्तान क्रमशः सातौँ, आठौँ, नवौँ र दशौँ स्थानमा रहेका छन् ।
यसैबीच, नेपाली राष्ट्रिय क्रिकेट टोली हाल ओमानमा जारी आईसीसी टी-२० विश्वकप एसिया-प्यासिफिक क्षेत्रीय छनोटको सुपर सिक्स चरण खेलिरहेको छ । नेपालले हालसम्म ६ अंक जोड्दै विश्वकप नजिक पुगेको छ ।
क्रिकेट विश्लेषकहरूका अनुसार नेपालले पछिल्ला खेलहरूमा देखाएको निरन्तर प्रदर्शनले अन्तर्राष्ट्रिय स्तरमा उसको सशक्त उपस्थिति स्थापित गरेको छ ।
प्रतिक्रिया