बुटवल । सामाजिक कार्यमा सक्रिय बुटवल गार्डियन्स ०७९ ले सुरज पाण्डेलाई समर्थन गर्ने निर्णय गरेको छ । पाण्डे उज्यालो नेपाल पार्टीका तर्फबाट रुपन्देही क्षेत्र नं. २ का उम्मेदवार हुन् ।
संस्थाले शुक्रबार बुटवलमा आयोजित कार्यक्रममा पाण्डेका एजेन्डा विकासमुखी र जनमुखी रहेको निष्कर्ष निकाल्दै औपचारिक रूपमा समर्थन घोषणा गरेको हो ।
कार्यक्रममा बोल्दै संस्थाका अध्यक्ष प्रविण मल्ल ठकुरीले पाण्डेले प्रस्तुत गरेका योजना र प्रतिबद्धता स्थानीय आवश्यकता अनुरूप रहेको बताए । उनले पाण्डेको नेतृत्वले क्षेत्रको समग्र विकासमा सकारात्मक योगदान पुग्ने विश्वास व्यक्त गरे ।
त्यस्तै, संस्थाका उपाध्यक्ष मोहन पाण्डेले सामाजिक रूपान्तरण, सुशासन र युवामुखी कार्यक्रमलाई प्राथमिकता दिएकै कारण पाण्डेको पक्षमा उभिने निर्णय गरिएको स्पष्ट पारे । उनले रुपन्देही क्षेत्र नं. २ को विकासका लागि सक्षम, इमानदार र दूरदर्शी नेतृत्व आवश्यक रहेको उल्लेख गरे ।
समर्थन घोषणासँगै संस्थाले आफ्ना सदस्य तथा शुभेच्छुकहरूलाई समेत पाण्डेको पक्षमा मतदान गर्न आह्वान गरेको छ । कार्यक्रममा दुई सयभन्दा बढी युवाहरू सहभागी भई पाण्डेको अभियानमा ऐक्यबद्धता जनाएका थिए ।
प्रतिक्रिया