काठमाडौं । गत २४ भदौमा भएको जेनजी आन्दोलनपछि नेपाली कांग्रेसका सभापति तथा पूर्वप्रधानमन्त्री शेरबहादुर देउवा पहिलोपटक सार्वजनिक भएका छन् । मंगलबार पार्टी केन्द्रीय कार्यालय सानेपामा बसेको केन्द्रीय समिति बैठकमा सहभागी हुन जाने क्रममा देउवा सार्वजनिक भएका हुन् ।
बुढानीलकण्ठस्थित आफ्नै निवासमा आन्दोलनकारीद्वारा कुटपिटमा परेका देउवा त्यसयता उपचारमा रहेका थिए । नेपाली सेनाले तत्कालीन समयमा देउवा र उनकी पत्नी सांसद आरजु राणा देउवालाई बुढानीलकण्ठबाट उद्धार गरेर सुरक्षित स्थानमा पुर्याएको थियो । सेनाले प्रारम्भमा हेलिकप्टरमार्फत उद्धार गर्न खोजे पनि परिस्थितिले अवरोध पुर्याएपछि स्थलमार्गबाट उद्धार गरिएको थियो ।
सुरक्षाका कारण उनका उपचारबारे विस्तृत जानकारी सार्वजनिक गरिएको थिएन । देउवालाई टाउकोमा गम्भीर चोट लागेर १२ टाँका लगाइएको थियो भन्ने जानकारी कांग्रेस नेता मीन विश्वकर्माले पत्रकार सम्मेलनमार्फत दिएका थिए ।
स्वास्थ्यलाभपछि मंगलबार पहिलोपटक सार्वजनिक कार्यक्रममा देखिएका देउवा अब नियमित राजनीतिक गतिविधिमा फर्किने संकेत मिलेको कांग्रेस निकट स्रोतहरूले बताएका छन् ।
प्रतिक्रिया