काठमाडौं । पूर्वसभामुख तथा नेकपा (माओवादी केन्द्र)का उपाध्यक्ष कृष्णबहादुर महरालाई भेप सुन तस्करी प्रकरणमा पुर्पक्षका लागि थुनामा पठाइएको छ । जिल्ला अदालत काठमाडौंमा मंगलबार र बुधबार भएको बयान र थुनछेक बहसपछि न्यायाधीशले उनलाई थुनामा पठाउने आदेश जारी गरेका हुन् ।
महराविरुद्ध ८ करोड ५५ लाख २८ हजार ३७४ रुपैयाँ बिगो र तीन वर्षभन्दा बढी कैद सजायको माग दाबी गरिएको छ । नेपाल प्रहरीको केन्द्रीय अनुसन्धान ब्यूरो (सीआईबी)ले उनलाई गत आइतबार पक्राउ गरेको थियो ।
महरामाथि विद्युतीय चुरोट (भेप) मा लुकाइ ल्याइएको सुन विमानस्थल भन्सारबाट छुटाउन दबाब दिएको आरोप लागेको छ ।
घटनाको सुरुवात १० पुस २०७९ मा फ्लाई दुबईको फ्लाइट नम्बर एफजेट ०५८७ मार्फत काठमाडौं आएका चिनियाँ नागरिक लि हानसोङसँगै भएको थियो । विमानस्थलमा चेकजाँचका क्रममा उनको सुटकेसभित्र भेप फेला परेपछि भन्सार कार्यालयले नियन्त्रणमा लिएको थियो । पासपोर्ट फिर्ता पाएपछि हासोङ भोलिपल्टै नेपाल छाडे, तर भेप भने लामो समयसम्म भन्सारमै थन्किएको थियो ।
त्यसपछि भेप साटिएको शंका लागेपछि भन्सार कार्यालयले २६ वैशाख २०८० मा सीआईबीलाई पत्राचार गरी अनुसन्धानको आग्रह गरेको थियो । दुई महिनासम्मको अनुसन्धानपछि सीआईबीले भेपमा करिब ९ किलो सुन तस्करी भएको निष्कर्ष निकालेको थियो ।
उक्त घटनामा भन्सारका नासु रेवन्त खड्कासहित छ जनाविरुद्ध मुद्दा दायर गरिएको थियो भने पूरक अभियोजनमा चिनियाँ मूलका बेल्जियम नागरिक दावा छिरिङ, उनका चालक लोकेन्द्र पौडेल, राहुल महरा र नीमा गुरुङलाई मतियार बनाएर मुद्दा चलाइएको थियो ।
अनुसन्धानका क्रममा महरालाई पनि सोधपुछ गरिएको थियो । सोही प्रकरणमा संलग्नताको आशंकामा उनलाई पक्राउ गरी अदालतमा उपस्थित गराइएको थियो । अदालतले प्रारम्भिक सुनुवाइपछि उनलाई पुर्पक्षका लागि थुनामा पठाउने आदेश जारी गरेको हो ।
प्रतिक्रिया