काठमाडौं । कालीमाटी फलफूल तथा तरकारी बजारमा बिक्रीका लागि ल्याइएका अकबरे खुर्सानीमा अत्यधिक मात्रामा विषादी भेटिएको छ । मकवानपुरका दुई किसानबाट बजारमा ल्याइएका नमूनामा क्रमशः ४९.०३२ र ५१.४४६ प्रतिशत ‘अर्गानोफस्फेट’ नामक विषादी पाइएको कालीमाटी फलफूल तथा तरकारी बजार विकास समितिले जनाएको छ ।
केन्द्रीय कृषि प्रयोगशालाले सोमबार कालीमाटी बजारका १७ वटा पसलबाट संकलित १७ थरी फलफूल तथा तरकारीको नमूना परीक्षण गर्दा यस्तो तथ्य सार्वजनिक भएको हो ।
परीक्षण अनुसार, सो खुर्सानीमा पाइएको विषादीको मात्रा सरकारले तोकेको मापदण्डभन्दा निकै माथि रहेको छ । सरकारी मापदण्डअनुसार अर्गानोफस्फेटको मात्रा ३५ प्रतिशतभन्दा कम भए मात्र उपभोगयोग्य मानिन्छ ।
५ देखि ४५ प्रतिशतसम्म विषादी पाइएमा केही दिन राखेपछि मात्र सेवन गर्न मिल्ने प्रावधान छ, तर ४५ प्रतिशतभन्दा बढी पाइएमा ती वस्तु पूर्ण रूपमा उपभोगका लागि अयोग्य मानिन्छन् ।
यसअघि पनि मकवानपुरबाट ल्याइएका अकबरे खुर्सानीमा ५४.०७८ प्रतिशत विषादी पाइएको थियो । त्यस्तै, गत बिहीबार कालीमाटी बजारमा बिक्रीका लागि ल्याइएका हरियो फर्सी, काँक्रो र घिरौँलामा समेत अत्यधिक मात्रामा विषादी अवशेष भेटिएको थियो ।
प्रतिक्रिया