बुटवल । देशभरका पार्कहरूको विशिष्टिकरण गर्दै तिनलाई आकर्षक र अध्ययनयोग्य बनाउनेमा सरोकारवालाहरूले जोड दिएका छन् । सामरिक र ऐतिहासिक महत्व बोकेको मणिमुकुन्द सेन उद्यान संरक्षण समितिको १७ औं वार्षिक साधारण सभामा बोल्ने वक्ताहरूले उद्यानहरूको पहिचान र विशिष्टिकरण गर्न सके पर्यटन प्रवर्द्धनमा ठूलो टेवा पुग्ने धारणा राखे ।
सोमबार सम्पन्न कार्यक्रममा लुम्बिनी प्रदेशका पूर्वमन्त्री भोजप्रसाद श्रेष्ठ र समितिका संरक्षक तथा बुटवल उपमहानगरपालिकाका नगरप्रमुख खेलराज पाण्डेयले संयुक्त रूपमा उद्घाटन गरे ।
कार्यक्रममा पूर्वमन्त्री श्रेष्ठले अतिक्रमणको चपेटामा रहेका ऐतिहासिक स्थलहरूलाई जोगाउने अभियानमा स्थानीय समुदायको भूमिकालाई प्रशंसा गर्दै मणिमुकुन्द सेन उद्यानको ऐतिहासिक र सामरिक महत्वलाई संरक्षण गर्न निरन्तर प्रयास गर्नुपर्ने बताए । उनले फुलबारी क्षेत्रको प्रचार-प्रसार र पर्यटन पूर्वाधारमा जोड दिन सुझाव दिए ।
समितिका संरक्षक तथा नगरप्रमुख पाण्डेयले उद्यानहरूको विकास, संरक्षण र व्यवस्थापनमा स्थानीय सरकार निरन्तर क्रियाशील रहेको उल्लेख गरे । उनले समितिलाई अध्ययन तथा अनुसन्धान केन्द्रका रूपमा विकास गर्न कार्यविधि बनाएर अघि बढ्ने योजनाबारे जानकारी दिए ।
समितिका अध्यक्ष माधवप्रसाद नेपालले समितिले विगत वर्षमा दिगोपनाका आधार सुदृढ गर्न, प्रशासनिक दक्षता अभिवृद्धि गर्न, वैकल्पिक आम्दानीका स्रोत सिर्जना गर्न र समुदायसँगको साझेदारीलाई संस्थागत बनाउन उल्लेखनीय प्रगति हासिल गरेको बताए ।
उनका अनुसार मणिमुकुन्द सेन उद्यान धार्मिक सहिष्णुता र सांस्कृतिक सहअस्तित्वको उत्कृष्ट उदाहरण हो । “यो केवल घुमफिरको स्थल मात्र नभई अध्ययन, चिन्तन र आत्मिक अनुभूतिको पवित्र स्थान हो,” उनले भने ।
कार्यक्रममा बुटवल उपमहानगरपालिकाका उपप्रमुख साबित्रा देवी अर्याल, राष्ट्रिय उद्यान महासंघ नेपालका अध्यक्ष खेम लुईटेल, समितिका सल्लाहकार निर्मल जिसी र उपाध्यक्ष रमेश नेपाललगायतका वक्ताहरूले पनि पार्कहरूको विविधिकरण र दीगो व्यवस्थापनमा जोड दिए ।
समितिका अनुसार विगत एक वर्षमा मणिमुकुन्द सेन उद्यानमा ५ लाख ४७ हजार १९९ जना पर्यटकले भ्रमण गरेका छन् । तीमध्ये ७४ हजार भारतीय र १७५ जना तेस्रो मुलुकका पर्यटक रहेका छन् । सो अवधिमा उद्यानले ४ करोड १० लाख ३४ हजार रुपैयाँ आम्दानी गरेको छ । समितिमा हाल ६०१ सदस्य आवद्ध छन् ।
प्रतिक्रिया