काठमाडौं । इरानले कतारमा रहेको अमेरिकी सैन्य अड्डा अल उदैद एयर बेसमा क्षेप्यास्त्र प्रहार गरेको कतारको रक्षा मन्त्रालयले पुष्टि गरेको छ । कतारको राजधानी दोहाको दक्षिणपश्चिममा अवस्थित अल उदैद एयर बेस मध्यपूर्व क्षेत्रमा रहेको अमेरिकाको सबैभन्दा ठूलो सैन्य अड्डामध्ये एक हो ।
कतारको रक्षा मन्त्रालयद्वारा जारी वक्तव्यअनुसार मंगलबार राति इरानबाट प्रहार गरिएका दुईवटा ब्यालेस्टिक क्षेप्यास्त्र कतारतर्फ लक्षित थिए । तीमध्ये एउटा क्षेप्यास्त्रलाई हवाई प्रतिरक्षा प्रणालीले बीचमै निष्क्रिय पारेको र अर्को अल उदैद सैन्य अड्डा क्षेत्रमा खसेको जनाइएको छ ।
घटनाबाट कुनै मानवीय क्षति नभएको मन्त्रालयले स्पष्ट पारेको छ । यद्यपि भौतिक क्षतिको विवरण भने सार्वजनिक गरिएको छैन ।
कतारी सशस्त्र बलसँग देशको सार्वभौमसत्ता र भौगोलिक अखण्डता जोगाउने पूर्ण क्षमता रहेको उल्लेख गर्दै मन्त्रालयले कुनै पनि बाह्य खतराप्रति कडा जवाफ दिन तयार रहेको जनाएको छ ।
यसैबीच मन्त्रालयले नागरिक, आवासीय विदेशी तथा आगन्तुकलाई शान्त रहन, आधिकारिक निर्देशन पालना गर्न तथा अपुष्ट हल्लाको सट्टा प्रमाणित सूचनामा मात्र विश्वास गर्न आग्रह गरेको छ ।
प्रतिक्रिया