काठमाडौं । रिलायन्स स्पिनिङ मिल्सले नेपाल विद्युत् प्राधिकरणप्रति आफ्नो बक्यौता रकम तिर्न सुरु गरेको छ । कम्पनीले ७५ करोड ३७ लाख रुपैयाँ बक्यौतामध्ये पहिलो किस्ता बुझाएको प्राधिकरणका प्रवक्ता राजन ढकालले जानकारी दिएका छन् ।
विगतमा लोडसेडिङको समयमा डेडिकेटेड तथा ट्रंकलाइनमार्फत् विद्युत् उपभोग गरेको सुनसरीस्थित उक्त उद्योगले प्रिमियम महसुलबापत २८ किस्तामा रकम बुझाउने सहमति गरेको हो । पहिलो किस्तास्वरूप रिलायन्सले दुई करोड ७७ लाख रुपैयाँ बुझाएपछि प्राधिकरणले विच्छेद गरिएको विद्युत् लाइन पुनः जडान गरेको कार्यकारी निर्देशक मनोज सिलवालले बताए ।
रिलायन्सले २०७२ माघदेखि २०७५ वैशाखसम्मको अवधिका लागि डेडिकेटेड तथा ट्रंकलाइन प्रयोगबापतको महसुल बुझाउन बाँकी राखेको थियो । तर कम्पनीले बुझाएको रकमलाई ‘किस्ता’ नभई ‘विवादित रकम’ भन्दै धरौटीका रूपमा बुझाएको जनाएको छ ।
गोल्याण ग्रुपकी कर्पोरेट कम्युनिकेसन म्यानेजर ज्योती गह्रैले भनिन्, “तत्काल विद्युत् लाइन जडान गरिने र त्यसपछि पुनरवलोकन तथा न्यायिक प्रक्रियामा जाने सहमति भएको थियो । सोही सहमतिअनुसार हामीले धरौटी रकम बुझाएका हौँ । विद्युत् आपूर्ति अवरुद्ध हुँदा उद्योग सञ्चालनमा अवरोध र हजारौँ श्रमिक रोजगारीविहीन हुने जोखिम भएकाले मध्यमार्ग अपनाएका हौँ ।”
प्रतिक्रिया