काठमाडौं । नेपाल कम्युनिस्ट पार्टी (नेकपा) ले नेकपा (माओवादी केन्द्र) लगायत दलहरू सम्मिलित समाजवादी मोर्चाबाट बाहिरिएको घोषणा गरेको छ ।
पार्टीका महासचिव नेत्रविक्रम चन्द ‘विप्लव’ ले मंगलबार एक विज्ञप्ति जारी गर्दै २०८० सालमा चार दलको सहभागितामा गठन भएको समाजवादी मोर्चा वर्तमान राजनीतिक परिस्थितिमा औचित्यहीन बनेको बताएका छन् ।
विज्ञप्तिमा भनिएको छ, “राष्ट्रिय स्वाधीनता, राज्यको अग्रगामी रूपान्तरण, जनजीविकाको पक्षमा तथा भ्रष्टाचारविरुद्ध सङ्घर्षको उद्देश्यले मोर्चा गठन गरिएको थियो। तर, अपेक्षित गतिमा काम अघि बढ्न सकेन ।”
विप्लवले जेनजी आन्दोलनपछि नेपालको राजनीतिक परिदृश्यमा आएको व्यापक परिवर्तनका कारण नयाँ प्रकारका एकता र मोर्चाबन्दीहरू बन्न थालेका बताउँदै वर्तमान सन्दर्भमा समाजवादी मोर्चाको भूमिका समाप्त भएको निष्कर्ष पार्टीले निकालेको उल्लेख गरेका छन् ।
उनले थपे, “समाजवादी मोर्चामा आबद्ध तीन पार्टीहरू नै एकता भई नेपाली कम्युनिस्ट पार्टी गठन गरिसकेका छन्, त्यसैले मोर्चाको वर्तमान स्वरूपको औचित्य समाप्त भएको निष्कर्षमा पुगेका छौँ ।”
प्रतिक्रिया