प्रधानमन्त्रीलाई फिर्ता बोलाउन माग गर्दै २३ जेनजी समुहको राष्ट्रपतिलाई ज्ञापनपत्र

काठमाडौँ । प्रत्यक्ष जननिर्वाचित प्रधानमन्त्रीका लागि संविधान संशोधन र ठुला भ्रष्टाचार प्रकरणमा संलग्नलाई कारबाही जस्ता मागबाट सरकार पन्छिँदै गएको भन्दै विभिन्न २३ वटा जेनजी समूहले राष्ट्रपति रामचन्द्र पौडेललाई ज्ञापनपत्र बुझाएका छन् ।

वर्तमान सुशीला कार्की नेतृत्वको सरकारबाट प्रत्यक्ष जननिर्वाचित प्रधानमन्त्रीका लागि संविधान संशोधन र ठुला भ्रष्टाचार प्रकरणमा संलग्नलाई कारबाही जस्ता म्यान्डेट सहितको अपेक्षा गरिए पनि सरकार मुख्य मागहरुलाई पन्छाएर चुनावमा मात्र केन्द्रीत भएको राष्ट्रपति पौडेललाई बुझाएको ज्ञापनपत्रमा उल्लेख गरिएको छ ।

जेनजी विद्रोहको जगमा बनेको सरकारले केवल चुनाव मात्रै गराउने कुरा स्वीकार्य नहुने भन्दै उनीहरुले दिशाहीन बनेको सरकारले आफ्ना माग पुरा गर्न नसके तत्काल प्रधानमन्त्रीलाई फिर्ता बोलाउन समेत माग गरेका छन् ।

जेन जी विद्रोह र शहादत केवल अर्ली इलेक्सनका लागि मात्रै नभएको जनाउँदै ज्ञापनपत्रमा विद्रोहमा संलग्न जेनजीका २३ एलाइन्स, घाइते र सहिद परिवारका माग सरकारले तत्काल सम्बोधन गर्नुपर्ने पनि उल्लेख गरिएको छ ।

राष्ट्रपति पौडेललाई ज्ञापनपत्र बुझाउनेमा जेनजी नेशनल फ्रन्ट लाइनर,जेनजी स्पार्क,एनटेक जेनजी, ऋणी एसोसिएसन,जेनजी वाई युनाइटेड, जेन्जी सभा, जेन्जस् पार्लियामेन्ट, जिबिबि ग्रुप, जियूपिसि ग्रुप, जेबाइएन ग्रुप, जेन्जी एलायन्स, नेपाल जेन्जी रिभ्यूलेसन (एनजिआर), १७। इक्वीटि नेपाल, स्वतन्त्र जेन्जी नेपाल, डिजिटल टास्क फोर्स जेन्जी ग्रुप, जेन्जी मुभमेन्ट नेपाललगायत रहेका छन् ।