काठमाडौं । साविक विजेता जनकपुर बोल्ट्सलाई चार विकेटले हराउँदै लुम्बिनी लायन्स नेपाल प्रिमियर लिग (एनपीएल) दोस्रो संस्करणको प्लेअफमा प्रवेश गर्ने चौथो टोली बनेको छ ।
लुम्बिनीको जितसँगै प्लेअफमा पुग्ने चार टिमको टुंगो लागेको छ। यसअघि नै सुदूरपश्चिम रोयल्स, काठमाडौं गोर्खाज र विराटनगर किंग्सले प्लेअफ स्थान पक्का गरिसकेका थिए । हारसँगै जनकपुर बोल्ट्स, पोखरा एभेन्जर्स, कर्णाली याक्स र चितवन राइनोजको यात्रा लिग चरणमै समाप्त भएको छ ।
शुक्रबार कीर्तिपुरस्थित त्रिवि क्रिकेट मैदानमा जनकपुरले प्रस्तुत गरेको १३३ रनको लक्ष्य लुम्बिनीले १९.१ ओभरमा ६ विकेट गुमाउँदै पूरा गर्यो ।
लुम्बिनीका रोहितकुमार पौडेलले सर्वाधिक ३४ रन योगदान गरे। ०-१ को चुनौतीपूर्ण अवस्थामा डी‘एर्सी शर्टसँग मिलेर उनले ६१ रनको महत्वपूर्ण साझेदारी बनाउँदै पारी सम्हाले । शर्टले ३० रन जोड्दा जेजे स्मिथले २१ तथा निरोसान डिकवेलाले १७ रन थपे । दीलिप नाथ १५ रनमा अविजित रहे ।
जनकपुरका संगिथ कुरे र मयन यादवले दुई-दुई विकेट लिए भने सञ्जय कृष्णमुर्थीले एक विकेट हात पारे । जनकपुरले लुम्बिनीविरुद्ध सात स्पिनर प्रयोग गर्ने रणनीति अपनाएको थियो ।
यसअघि टस जितेर ब्याटिङ थालेको जनकपुरले २० ओभरमा ६ विकेट गुमाएर १३२ रन बनाउन सकेको थियो । संगिथ कुरेले ४५ रनको पारी खेल्दै टीमलाई सम्मानजनक स्कोरसम्म पु¥याए । ८३-६ को स्थितिबाट उनले मयन यादवसँग सातौँ विकेटका लागि ४९ रनको महत्वपूर्ण साझेदारी गरे । यादवले २७ रन जोडे ।
ओपनर आसिफ सेख २० रनमा आउट भए भने सञ्जय कृष्णमुर्थीले १४, माज सदाकतले ६ र अनिल साहले ७ रन मात्र बनाए । कप्तान जान निकोल लोफ्टी इटोन गोल्डेन डकमा पवेलियन फर्किए ।
लुम्बिनीका शेर मल्ल र कप्तान रोहितकुमार पौडेलले समान दुई-दुई विकेट लिए । जेजे स्मिथ र रुबेन ट्रम्पलमेनले एक-एक विकेट प्राप्त गरे ।
प्रतिक्रिया