बुटवल । राष्ट्रिय लोक तथा दोहोरी गीत प्रतिष्ठान लुम्बिनी प्रदेशको सातौँ वार्षिक साधारणसभा तथा तेस्रो अधिवेशन आज (शनिबार) बुटवलमा हुँदैछ । अधिवेशनले आगामी कार्यकालका लागि नयाँ नेतृत्व चयन गर्ने अध्यक्ष दिपु मगरले जानकारी दिए ।
उनका अनुसार प्रदेशभरबाट आएका १६५ प्रतिनिधि तथा विभिन्न अतिथिसहित करिब ३०० भन्दा बढी सहभागीहरूको उपस्थिति रहनेछ । अधिवेशनमा पाँच विधामा उत्कृष्ट स्रष्टाहरूलाई सम्मान गर्ने तयारी भएको छ ।
कार्यक्रममा प्रतिष्ठानका पूर्व केन्द्रीय अध्यक्ष एवम् चर्चित कलाकार चन्द्र शर्मा, गायक बद्री पंगेनी, उपाध्यक्ष सुवास केसी, सचिव दिपक गरौजा, सहसचिव सीता रानालगायतको उपस्थित रहने जनाइएको छ । अधिवेशनको उद्घाटन लुम्बिनी प्रदेशका शहरी विकासमन्त्री सरोज थापाले गर्ने कार्यक्रम छ ।
अध्यक्ष मगरका अनुसार वर्तमान समितिले तीन वर्षको अवधिमा उल्लेख्य काम सम्पन्न गरेको छ । कलाकारहरूको हितका लागि एक लाख रुपैयाँ बराबरको हित कोष स्थापना गरेर सुरुवात गरिएपछि त्यसलाई आर्थिक रूपमा सशक्त बनाउँदै हालसम्म चार लाख रुपैयाँभन्दा बढीको कोष निर्माण गरिएको छ । साथै विभिन्न प्रतियोगितात्मक कार्यक्रम आयोजना गर्ने तथा रुपन्देहीको तिलोत्तमा स्थित लुम्बिनी लोक संग्रहालयको स्तरोन्नती गर्ने जस्ता कार्यहरू सम्पन्न भएको जनाएको छ ।
प्रतिक्रिया