बुटवल । बुटवल उपमहानगरपालिका वडा नम्बर-१९ को नयाँ वडा कार्यालय भवन निर्माणको कार्य औपचारिक रूपमा सुरु भएको छ । वडाको रानीबारीस्थित भवनको शिलान्यास शुक्रबार उपमहानगर प्रमुख खेलराज पाण्डेयले गरे ।
शिलान्यास समारोहमा प्रमुख पाण्डेयले निर्धारित समयभित्र निर्माण कार्य पुरा गरी स्थानीयलाई सहज सेवा दिने वातावरण बनाउन ठेकेदार कम्पनीलाई आग्रह गरे । संघीयता लागू भएको करिब एक दशक बित्दासमेत वडाको आफ्नै भवन नबनिनु दुर्भाग्यपूर्ण रहेको उल्लेख गर्दै उनले संघीय सरकारबाट जग्गा प्राप्तिमा भएको ढिलासुस्तीले निर्माण प्रक्रिया प्रभावित भएको बताउँदै गुनासो व्यक्त गरे । ढिलाइका कारण हालसम्म वडा कार्यालय भाडाको घरबाट सञ्चालन गर्नुपरेको उनले बताए ।
बुटवल-१९ को वडा कार्यालय वि.स. २०७३ सालदेखि भाडामा सञ्चालन हुँदै आएको छ । सुरुमा मासिक १२ हजार रुपैयाँ तिर्ने गरेको कार्यालयले हाल मासिक १८ हजार रुपैयाँ भाडा बुझाउँदै आएको छ । यसैगरी नजिकैको वडा नम्बर १८ को कार्यालय निर्माणका लागि आवश्यक जग्गा प्राप्तिको प्रक्रिया अन्तिम चरणमा पुगेको प्रमुख पाण्डेयले जानकारी दिए ।
बुटवल–१९ को नयाँ वडाभवन निर्माणका लागि मंसिर २४ गते सिभिल-रसभ कन्स्ट्रक्सन जेभीसँग सम्झौता भएको हो । २ करोड ७३ लाख ५६ हजार ३५८ रुपैयाँ लागतमा निर्माण हुने भवन आगामी २०८३ असार १५ गतेभित्र सम्पन्न गर्ने लक्ष्य राखिएको छ ।
इञ्जिनियर नवराज पौडेलका अनुसार उक्त भवनमा दुईवटा सभाहलसहित १३ कोठा रहनेछन् ।
प्रतिक्रिया