काठमाडौं । मधेस प्रदेशमा सभामुख चयनका लागि आज आइतबार मतदान हुँदैछ । सभामुख पदका लागि दुई जनाको उम्मेदवारी परेकाले प्रदेशसभाबाट निर्वाचन प्रक्रिया अघि बढ्न लागेको हो ।
मधेस प्रदेशको सभामुखका लागि जनता समाजवादी पार्टी (जसपा) नेपालका रामआशीष यादव र नेकपा ९एमाले०का त्रिलोकी प्रसाद उम्मेदवार रहेका छन् । यादव सत्तारुढ सात दलीय गठबन्धनका साझा उम्मेदवार हुन् ।
प्रदेशसभा सचिवालयले सार्वजनिक गरेको निर्वाचन कार्यतालिकाअनुसार आइतबार दिउँसो १ बजे बस्ने प्रदेशसभा बैठकमा सभामुख निर्वाचनसम्बन्धी प्रस्ताव निर्णयार्थ प्रस्तुत गरिनेछ ।
जसपा नेपालका प्रमुख सचेतकसमेत रहेका यादवको उम्मेदवारीमा नेपाली कांग्रेसका प्रदेशसभा सदस्य वीरेन्द्रकुमार सिंह प्रस्तावक र नेकपा (माओवादी केन्द्र)का फकिरा महतो समर्थक रहेका छन् । उम्मेदवारी दर्ताअघि बसेको सात दलीय गठबन्धनको बैठकले यादवलाई सर्वसम्मत रूपमा साझा उम्मेदवार बनाउने निर्णय गरेको थियो ।
त्यसैगरी, एमालेका उम्मेदवार त्रिलोकी प्रसादको प्रस्तावकमा प्रदेशसभा सदस्य शारदादेवी थापा र समर्थकमा जयचन्द्रप्रसाद पटेल रहेका छन् । उम्मेदवारी दर्ताअघि बसेको एमाले संसदीय दलको बैठकले त्रिलोकी प्रसादलाई आधिकारिक उम्मेदवार बनाउने निर्णय गरेको हो ।
आइतबार हुने मतदानबाट मधेस प्रदेशले नयाँ सभामुख पाउनेछ ।
प्रतिक्रिया