काठमाडौं । काठमाडौं महानगरपालिकाका मेयर बालेन्द्र शाह (बालेन) ले दुई साताभित्र पदबाट राजीनामा दिने तयारी गरेका छन् । राष्ट्रिय स्वतन्त्र पार्टी (रास्वपा) सँग भएको सात बुँदे सहमतिपछि बालेनले औपचारिक रूपमा मेयर पद त्यागेर सक्रिय संसदीय राजनीतिमा प्रवेश गर्ने तयारी गरेका हुन् ।
आइतबार बिहान ४ बजे रास्वपाका शीर्ष नेतासँग भएको सहमतिपछि बालेनले राजीनामाको तयारी थालेका हुन् । मेयरका प्रमुख स्वकीय सचिव भूपदेव शाहका अनुसार महानगरसँग सम्बन्धित केही महत्त्वपूर्ण काम टुंग्याएपछि मात्रै बालेनले पद छाड्नेछन् ।
“उचित समय आएपछि मेयरज्यूले राजीनामा दिनुहुन्छ । महानगरसँग सम्बन्धित केही बाँकी काम सकाएर दुई साताभित्र राजीनामा दिने तयारी छ,” उनले बताए ।
आगामी फागुन २१ गते प्रतिनिधिसभा निर्वाचन हुने तय भइसकेको छ । निर्वाचन कार्यतालिका अनुसार माघ ६ गते उम्मेदवारको मनोनयन दर्ता हुँदैछ । रास्वपा र बालेनबीच भएको सहमतिअनुसार उनी पार्टीको संसदीय दलको नेता तथा प्रधानमन्त्रीको उम्मेदवारका रूपमा अघि बढ्ने तयारीमा छन् ।
यसअघि आइतबार बिहान बालेन र रास्वपाका सभापति रवि लामिछानेबीच भएको छलफलपछि सात बुँदे सहमति सार्वजनिक गरिएको थियो । सो सहमतिले बालेनको राष्ट्रिय राजनीतिमा प्रवेश औपचारिक रूपमा सुनिश्चित गरेको राजनीतिक वृत्तमा चर्चा छ ।
मेयरका रूपमा शहरी व्यवस्थापन, अवैध संरचना नियन्त्रण र प्रशासनिक सुधारका कारण चर्चामा रहेका बालेन अब स्थानीय तहको नेतृत्वबाट बाहिरिँदै राष्ट्रिय राजनीतिमा सक्रिय हुने भएपछि राजधानीको राजनीति थप चासोको केन्द्र बनेको छ ।
प्रतिक्रिया