खजुरा । बाँके निर्वाचन क्षेत्रनम्बर ३ बाट सिफारिस भएका उम्मेदवार विरुद्ध आकााक्षीहरुले निर्णय सच्याउन माग गरेका छन् । आकाँक्षीहरुले उम्मेदवार छनौट कार्यबिधि र अपानीको उल्लंघन भएको जनाउँदै निर्णय सच्याउन माग गरेका हुन् ।
उनीहरुले एमाले जिल्ला कमिटीलाई निवेदन गर्दै दाबेदारहरुसँग मौखिक वा लिखित सहमति नलिई बिधि विपरित क्षेत्रीय समन्वय समितिले एकल उम्मेदवारको नाम सिफारिस गरेको आरोप लगाएका छन् । क्षेत्रीय समन्वय समितिको निर्णयले दाबेदारहरुको अधिकार हनन् भएको जनाउँदै दाबेदारहरुले बिधि विपरित सिफारिस गर्ने कमिटीमाथि कारवाही गर्न माग गरेका छन् ।
यस्तो माग गर्नेहरुमा बाँके जिल्ला कमिटीका निवर्तमान अध्यक्ष किस्मतकुमार कक्षपति, चन्द्रबहादुर चौधरी, भक्तबहादुर केसी, अब्दुल करिम खान, लालबहादुर खत्री, पदमबहादुर धिताल र इ. विवेक लामिछाने रहेका छन् ।
उनीहरुले एमाले अध्यक्ष केपी ओली, महासचिव शंकर पोखरेल, केन्द्रीय सदस्यहरु शान्ति ढकाल, सुर्य ढकाल, हारुन कादरी र लुम्बिनी प्रदेश कमिटी अध्यक्ष राधाकृष्ण कंडेललाई बोधार्थ समेत दिएका छन् । पूर्व अध्यक्ष कक्षपति अघिल्लो प्रतिनिधिसभा निर्वाचनमा पराजित उम्मेदवार हुन् भने अहिले सिफारिस भएका दरबहादुर सुनार अघिल्लो निर्वाचनमा एमालेका बिद्रोही उम्मेदवार हुन् ।
उता बाँके क्षेत्र नम्बर १ मा पनि केन्द्रीय सदस्य सुर्य ढकालको एकल सिफारिस भएपछि नरैनापुर गाउँ कमिटीले क्षेत्रीय समन्वय समितिको बैठक बहिस्कार गर्दै सिफारिस सच्याउन माग गरेको छ ।
एमाले बाँकेमा महाधिवेशन प्रतिनिधि चयन देखि नै ओली गुटभित्रैबाट दुईवटा समुह सक्रिय रहँदै आएको छ ।
प्रतिक्रिया