खजुरा । आसन्न प्रतिनिधिसभा निर्वाचनमा बाँके निर्वाचन क्षेत्र नम्बर ३ मा एमालले दलबहादुर सुनारलाई दिने भनिएको उम्मेदवारको टिकट खोसेर सुमन मल्ललाई दिएको छ । जिल्लाबाट एकल र प्रदेशबाट १ नम्बरमा सिफारिस भएका दलबहादुर सुनारलाई दिइएको टिकट आज एक्कासी परिवर्तन गर्दै सुमन मल्ललाई दिइएको हो ।
जिल्ला र प्रदेशबाट सिफारिस भए बमोजिम दलबहादुर सुनारलाई दिइएको भनिएको टिकट पार्टी केन्द्रले मल्ललाई दिने निर्णय आएको एमाले बाँकेका इन्चार्ज शान्ति ढकालले बताइन् । सुमनको पार्टीको कुनै तहबाट पनि सिफारिस भएको थिएन ।
सुनारले आजै मात्र निर्वाचन क्षेत्र नम्बर ३ को क्षेत्रीय समन्वय समितिको भेलाबाट चुनावी दौडाहा सुरु गरेका थिए । क्षेत्री समितिको भेलाले सुनारलाई विजयी बनाउन विभिन्न सकिति समेत गठन गर्ने प्रक्रिया थालेको थियो ।
सुनारलाई टिकट दिने निर्णय भएपछि एमाले बाँकेका प्रभावशाली नेताहरुले असन्तुष्टी प्रकट गरेका थिए । अघिल्लो निर्वाचनमा एमाले परित्याग गर्दै माओवादीमा प्रवेश गरेर माओवादीको एउटा गुटको उम्मेदवार बनेका सुनारलाई टिकट दिइएको भन्दै एमाले भित्र विरोधका स्वरहरु उठेका थिए ।
बाँकेमा २ मा पनि एक्कासी जसपा उपमहासचिव मो. इश्तियाक राइलाई केन्द्रले टिकट दिएर पठाएपछि जिल्लामा असन्तुष्टीका आवाज सुनिएका छन् । निरन्तर पार्टी र संगठनका लागि अहोरात्र खट्ने कार्यकर्ताको भावनालाई बेवास्ता गर्दै अकैं पार्टीका व्यक्तिलाई टिकट दिएको भन्दै बाँकेमा कार्यकर्ताहरुले असन्तुष्टी व्यक्त गरेका हुन् ।
प्रतिक्रिया