काठमाडौं । गैरआवासीय नेपाली संघ (एनआरएनए) राष्ट्रिय समन्वय परिषद् अमेरिकाले युवा तथा खेलकुदमन्त्री बब्लु गुप्तालाई अमेरिका भ्रमणका लागि कुनै पनि कार्यक्रममा आमन्त्रण नगरेको स्पष्ट पारेको छ ।
मन्त्री गुप्ताको अमेरिका भ्रमणको समाचार सार्वजनिक भएसँगै एनआरएनए अमेरिकाका प्रवक्ता सन्देश उप्रेतीले विज्ञप्ति जारी गर्दै यस्तो जानकारी गराएका हुन् ।
विज्ञप्तिमा भनिएको छ, ‘एनआरएनए एनसीसी युएसएले नेपाल सरकारका माननीय युवा तथा खेलकुदमन्त्री बब्लु गुप्तालाई अमेरिकामा कुनै पनि कार्यक्रमका लागि आमन्त्रण गरेको छैन । साथै, अमेरिकामा कुनै पनि युवासम्बन्धी कार्यक्रम आयोजना गरिएको छैन ।’
संस्थाले आफ्नो नाम, ईआईएन नम्बर र वेबसाइटको दुरुपयोग गरी अनधिकृत कार्यक्रम सञ्चालन तथा फन्डराइजिङ भइरहेको विश्वसनीय जानकारी प्राप्त भएको जनाएको छ । यस्ता गतिविधिहरूसँग संस्थाको कुनै स्वीकृति वा संलग्नता नरहेको र ती पूर्ण रूपमा अवैध तथा अमान्य हुने विज्ञप्तिमा उल्लेख छ ।
यसैगरी, संस्थाको नाम र पहिचान दुरुपयोग गर्ने व्यक्ति वा समूहविरुद्ध आवश्यक कानुनी कारबाही अगाडि बढाइने चेतावनी दिइएको छ । विज्ञप्तिमा भनिएको छ, ‘यस्ता गैरकानुनी तथा अनधिकृत गतिविधिहरूको गम्भीरतालाई मध्यनजर गर्दै सम्पूर्ण विवरण संयुक्त राज्य अमेरिकाको होमल्यान्ड सेक्युरिटी विभाग र नेपालस्थित अमेरिकी दूतावासलाई औपचारिक रूपमा जानकारी गराइनेछ ।’
एनआरएनए अमेरिकाले आफूहरू कानुनी रूपमा दर्ता भएको आधिकारिक संस्था भएको र यस्ता दुरुपयोगले गम्भीर कानुनी तथा प्रतिष्ठागत जोखिम निम्त्याउने भन्दै सबैलाई आधिकारिक माध्यमबाट आएका सूचना मात्र विश्वास गर्न आग्रह गरेको छ ।
यसअघि मन्त्री गुप्ताको अमेरिका भ्रमण प्रकरणमा फर्जी निमन्त्रणाको आरोप लगाउँदै अख्तियार दुरुपयोग अनुसन्धान आयोगमा उजुरी परेको समाचार पनि सार्वजनिक भएको छ ।
प्रतिक्रिया