काठमाडौं । गगन थापा नेतृत्वको नेपाली कांग्रेसका नवनिर्वाचित नेताहरू पार्टीको विशेष महाधिवेशनपछिका निर्णय औपचारिक रूपमा अद्यावधिक गराउन निर्वाचन आयोग पुगेका छन् ।
बिहीबार ललितपुरको कुपण्डोलमा सम्पन्न नेपाली कांग्रेसको पहिलो केन्द्रीय समिति बैठकले विशेष महाधिवेशनपछि भएका निर्णयहरू आयोगमा दर्ता तथा अद्यावधिक गराउने निर्णय गरेको थियो । सोही निर्णयअनुसार सभापति गगन थापा, उपसभापति विश्वप्रकाश शर्मा तथा अन्य पदाधिकारीसहितको टोली केहीबेरअघि निर्वाचन आयोग पुगेको हो ।
नवनियुक्त पार्टी प्रवक्ता देवराज चालिसेले विशेष महाधिवेशनबाट निर्वाचित नेतृत्वका निर्णयहरू कानुनी तथा प्रशासनिक रूपमा कार्यान्वयन गर्न आयोगमा पुगेको जानकारी दिए । उनका अनुसार पार्टीको आधिकारिक हस्ताक्षर परिवर्तन, उम्मेदवार प्रयोजनका लागि प्रयोग हुने हस्ताक्षर अद्यावधिक तथा समानुपातिक उम्मेदवारको सूची संशोधनसम्बन्धी निर्णयहरू आयोगमा प्रस्तुत गरिनेछ ।
‘विशेष महाधिवेशनपछिको निर्णय अद्यावधिक गराउन निर्वाचन आयोग जाने तथा उम्मेदवार प्रयोजनका लागि हस्ताक्षर परिवर्तन गर्न र समानुपातिक उम्मेदवारको सूची संशोधन गर्न आयोग जाने निर्णय भएको हो,’ चालिसेले भने ।
बैठकले नेपाली कांग्रेसका सभापतिको हैसियतमा यसअघि शेरबहादुर देउवाले प्रयोग गर्दै आएको हस्ताक्षर हटाई नयाँ सभापति गगन थापाको हस्ताक्षर कायम गराउने निर्णय गरेको जनाइएको छ । सो निर्णयलाई औपचारिक मान्यता दिलाउन आयोगमा निवेदन दिइएको छ ।
प्रवक्ता चालिसेले आयोगमा आवश्यक कागजात र निर्णय पेस गरेपछि नेपाली कांग्रेसको आधिकारिकतासम्बन्धी देखिएको विवाद निर्वाचन आयोगले यथाशक्य चाँडो समाधान गरिदिने अपेक्षा गरिएको बताए ।
विशेष महाधिवेशनपछि पार्टीको नेतृत्व, संगठनात्मक संरचना तथा निर्णयहरू कार्यान्वयनको चरणमा पुगेका छन् । आयोगको निर्णयसँगै कांग्रेसको नयाँ नेतृत्वले आगामी राजनीतिक गतिविधि र निर्वाचन तयारीलाई तीव्र बनाउने अपेक्षा गरिएको छ ।
प्रतिक्रिया