काठमाडौं । निर्वाचन आयोगले गगन थापा नेतृत्वको नेपाली कांग्रेसलाई मान्यता दिएको छ ।
आयोगको शुक्रबार बसेको बैठकमा आयोगका तीन आयुक्तहरुमध्ये बहुमतको आधारमा थापा नेतृत्वले आयोजना गरेको विशेष महाधिवेशनलाई औपचारिक मान्यता दिएको हो । यससँगै थापाको सभापतित्वमा रहेको कार्यसमितिलाई मान्यता पाएको छ । बैठकले विशेष महाधिवेशनलाई कानून र पार्टी विधानअनुसार वैध ठहर गर्दै त्यहाँबाट निर्वाचित पदाधिकारीहरूको विवरण अद्यावधिक गर्ने निर्णय गरेको छ ।
कार्यवाहक प्रमुख निर्वाचन आयुक्त रामप्रसाद भण्डारीसहित आयोगका पदाधिकारीहरूले कांग्रेसका दुवै पक्षबाट पेश भएका कागजात र विवरण अध्ययन गरेका थिए । त्यसपछि विशेष महाधिवेशनबाट निर्वाचित कार्यसमितिलाई आधिकारिक मान्ने कि देउवा नेतृत्वको पुरानै कार्यसमितिलाई मान्यता दिने भन्नेबारेमा आयोग पदाधिकारीहरुबीच छलफल भएको थियो । आयोगका तीन पदाधिकारीमध्ये दुई जनाले विशेष महाधिवेशनलाई मान्यता दिने पक्षमा र एक जनाले विपक्षमा राय दिएका थिए । कार्यवाहक प्रमुख निर्वाचन आयुक्त रामप्रसाद भण्डारी र निर्वाचन आयुक्त जानकी तुलाधरले पक्षमा मत दिएका थिएका थिए भने आयुक्त सगुन शमशेर राणाले विपक्षमा राय दिएका थिए ।
यस निर्णयसँगै विशेष महाधिवेशनबाट गरिएका सबै निर्णयहरूले वैधानिक मान्यता पाउने भएका छन् । विशेष महाधिवेशन अमान्य भएको दाबी गर्दै शेरबहादुर देउवा समूहले अघि सारेको तर्क स्वतः अस्वीकृत भएको छ ।
नेपाली कांग्रेसको बहुमत महाधिवेशन प्रतिनिधि उपस्थित विशेष महाधिवेशनबाट थापा सभापति सर्वसम्मत निर्वाचित भएका थिए । सभापति चयन भएसँगै बिहीबार बसेको केन्द्रीय समिति बैठकबाट निर्णय गरेर आधिकारिता दाबी गर्न सो समुह आयोग पुगेका थिए । आयोगले सबै डकुमेन्ट अध्ययन गरेर थापा नेतृत्वको कमिटीलाई आधिकारिकता दिएको हो ।
राजधानीको भृकुटीमण्डपमा पुस २७ देखि ३० सम्म कांग्रेसको विशेष महाधिवेशन आयोजना गरिएको थियो । नेपाली कांग्रेसको चुनाव चिह्न रुख र चारतारे झण्डा अव थापा नेतृत्वको कांग्रेसले प्रयोग गर्ने छ ।
देउवा पक्षले पनि आफू नै आधिकारिक भएको जिकिरसहित आयोगमा डकुमेन्ट बुझाएको थियो । आयोगले आफ्नो पक्षमा निर्णय नगरे आन्दोलन गर्ने सो समुहले घोषणा समेत गरेको छ ।
देउवा पक्षले आयोगको निर्णय विरुद्ध सर्वोच्च अदालत जानेछ ।
प्रतिक्रिया