बुटवल । नेपाली कांग्रेसले रुपन्देही क्षेत्र नं. २ बाट उद्योगी चुन्नप्रसाद पौडेललाई उम्मेदवार बनाएको छ ।
बुटवलमा सामाजिक व्यक्तित्वको रुपमा परिचित पौडेललाई कांग्रेसले आज उम्मेदवार बनाउने निर्णय गरेको हो ।
बुटवलमा उद्योग, स्वास्थ्य र सामाजिक सेवाका क्षेत्रमा सक्रिय रहँदै आएका पौडेललाई कांग्रेसले स्थानीय लोकप्रियता, सामाजिक योगदान र संगठनप्रतिको प्रतिबद्धतालाई मूल्याङ्कन गर्दै उम्मेदवार बनाएको पार्टी स्रोतले जनाएको छ । कांग्रेस नेतृत्वले विकास, रोजगारी र सेवा क्षेत्रमा अनुभवी व्यक्तिलाई अघि सारेर मतदाताको विश्वास जित्ने रणनीति अनुसार पौडेललाई उम्मेदवार बनाएको बताइएको छ ।
पौडेल यशोधा फुड्सको अध्यक्ष हुन् भने बुटवल अस्पतालको अध्यक्ष पनि हुन् ।
उनले उद्योग व्यवसायसँगै स्वास्थ्य सेवाको विस्तार र सामाजिक उत्तरदायित्वका क्षेत्रमा महत्वपूर्ण योगदान पुर्याउँदै आएका छन् । बुटवल र आसपासका क्षेत्रमा उनको सामाजिक सक्रियता र सहयोगी स्वभावका कारण उनी एक परिचित तथा सम्मानित व्यक्तित्वका रूपमा चिनिन्छन् ।
कांग्रेसले पौडेलको उम्मेदवारीले रुपन्देही–२ मा पार्टीलाई बलियो बनाउने विश्वास लिएको छ । उम्मेदवारी टुंगिएसँगै कांग्रेसले निर्वाचन अभियानलाई तीव्र बनाउँदै संगठनलाई एकढिक्का बनाएर चुनावी प्रतिस्पर्धामा होमिने तयारी थालेको जनाएको छ ।
यस क्षेत्रमा नेकपा एमालेबाट विष्णु पौडेल, नेकपाबाट सुवास पाण्डे (विश्वदीप), रास्वपाबाट इन्जिनियर आशिष सुवेदी, प्रलोपाबाट नारायण नगिलाले टिकट पाएका छन् ।
प्रतिक्रिया