काठमाडौं । आईसीसी टी-२० विश्वकप २०२६ को तयारीस्वरूप खेलिएको वार्म-अप खेलमा नेपाली क्रिकेट टोलीले चिरपरिचित प्रतिद्वन्द्वी संयुक्त अरब इमिरेट्स (यूएई) लाई ७ विकेटले पराजित गरेको छ । उपकप्तान दीपेन्द्रसिंह ऐरी र आरिफ शेखबीच भएको १०८ रनको साझेदारी नेपालको जितमा निर्णायक बनेको हो ।
१४६ रनको लक्ष्य पछ्याएको नेपालले १७ ओभरमा ३ विकेटको क्षतिमा लक्ष्य पूरा गर्दै शानदार जित निकालेको हो । नेपालले १८ बल बाँकी छँदै जित हात पारेको थियो ।
नेपालको सुरुवात भने कमजोर रह्यो । ६ ओभर ५ बलसम्म आइपुग्दा नेपालले ३ विकेट गुमाउँदै मात्र ४५ रन बनाएको थियो । ओपनर कुशल भुर्तेल र आशिफ शेख दुवैले ८-८ रन बनाउँदै आउट भएपछि नेपालको इनिङ सुरुमै दबाबमा परेको थियो । त्यसपछि मैदान उत्रिएका कप्तान रोहितकुमार पौडेल १९ बलमा १६ रन बनाएर रनआउट भएपछि नेपाल थप संकटमा परेको थियो ।
यसपछि क्रिजमा आएका आरिफ शेखले उपकप्तान दीपेन्द्रसिंह ऐरीसँग मिलेर नेपालको इनिङ सम्हालेका थिए । सात ओभरमा ३ विकेट गुमाएर ४५ रनमा सीमित रहेको नेपाललाई दुवैले १०८ रनको महत्वपूर्ण साझेदारी गर्दै जिततर्फ डो¥याएका हुन् ।
आरिफ शेखले ३७ बलमा दुई छक्का र आठ चौकासहित अविजित ६१ रनको शानदार इनिङ खेले । दीपेन्द्रसिंह ऐरीले ३१ बलमा एक छक्का र चार चौकासहित अविजित ५० रन बनाए ।
यसअघि टस हारेर पहिले ब्याटिङ गरेको यूएईले निर्धारित २० ओभरमा ६ विकेट गुमाउँदै १४५ रन बनाएको थियो । यूएईका लागि शोएब खानले सर्वाधिक ३८ रन बनाए भने हर्षित कौशिकले ३१ रनको योगदान दिएका थिए ।
नेपालका बलरहरू प्रभावशाली देखिएका थिए । करण केसी र सन्दीप लामिछानेले समान २-२ विकेट लिँदा दीपेन्द्रसिंह ऐरीले १ विकेट हात पारे ।
नेपालले अब दोस्रो वार्म-अप खेलमा बिहीबार क्यानडासँग प्रतिस्पर्धा गर्नेछ । विश्वकपअन्तर्गत पहिलो औपचारिक खेल भने नेपालले फेब्रुअरी ८ मा इंग्ल्यान्डविरुद्ध खेल्ने तालिका रहेको छ ।
प्रतिक्रिया