काठमाडौं । सहरी विकास मन्त्रालयले भदौ २३ र २४ गते भएको आन्दोलनका क्रममा मृत्यु भएका ४२ जना ‘जेनजी’ सहिदका परिवारलाई मासिक २१ हजार ८०० रुपैयाँका दरले पेन्सन निकासा गरेको छ । उक्त रकम पुनर्निर्माण कोषबाट उपलब्ध गराइएको मन्त्रालयले जनाएको छ ।
आन्दोलनका क्रममा कुल ७६ जनाको मृत्यु भएको थियो । तीमध्ये जेलबाट भागेका व्यक्तिहरू बाहेकलाई सहिद घोषणा गर्ने निर्णय गरिएको थियो । सहिद घोषितमध्ये तीन जना प्रहरी समेत रहेकामा हाल प्रहरी बाहेकका ४२ जनाका परिवारलाई सहरी विकास मन्त्रालयमार्फत मासिक पेन्सन रकम निकासा गरिएको हो ।
मन्त्रालयका प्रवक्ता नारायण रेग्मीका अनुसार सहिद परिवारलाई मासिक २१ हजार ८०० रुपैयाँ तथा वर्षमा १३ महिनाका दरले १० वर्षसम्म पेन्सन उपलब्ध गराइनेछ । यसका लागि कुल ११ करोड ९० लाख २८ हजार रुपैयाँ आवश्यक पर्ने र उक्त रकम पुनर्निर्माण कोषबाट निकासा गरिएको उनले जानकारी दिए ।
रेग्मीका अनुसार रकम निकासाको विषयमा अर्थ मन्त्रालयसँग छलफल भएको थियो । तर हाल अर्थ मन्त्रालयको औपचारिक स्वीकृति बिना नै पुनर्निर्माण कोषबाट रकम निकासा गरिएको हो ।
यता अर्थ मन्त्रालयका प्रवक्ता टङ्कप्रसाद पाण्डेयले भने राहतसम्बन्धी कुनै पनि फाइल अर्थ मन्त्रालयबाट स्वीकृत नभएको स्पष्ट पारेका छन् ।
प्रतिक्रिया