काठमाडौं । आईसीसी टी-२० क्रिकेट विश्वकपको वार्मअप खेलमा नेपालले लगातार दोस्रो जित हात पारेको छ । बिहीबार चेन्नईमा सम्पन्न दोस्रो वार्मअप खेलमा नेपालले क्यानडालाई ६ विकेटले पराजित गरेको हो ।
यसअघि नेपालले पहिलो वार्मअप खेलमा संयुक्त अरब इमिरेट्स (यूएई) लाई सात विकेटले पराजित गरेको थियो ।
चेन्नईस्थित एमए चिदम्बरम क्रिकेट रंगशालामा भएको खेलमा क्यानडाले प्रस्तुत गरेको १६२ रनको लक्ष्य नेपालले १८ ओभरमा चार विकेट गुमाउँदै पूरा गर्यो ।
नेपालको जितमा ओपनर आसिफ सेखले सर्वाधिक ५८ रनको योगदान दिए । उनले २९ बल खेल्दै ६ चौका र तीन छक्का प्रहार गरे । सन्दीप जोराले ३० बलमा चार चौका र एक छक्कासहित ४४ रन जोडे । गुल्सन झाले ३१ रन बनाए भने अर्का ओपनर कुशल भुर्तेलले १२ रन जोडेर आउट भए ।
क्यानडाका तर्फबाट जसकरन सिंह, साद बिन जफर र अजयभिर हुँदालले समान एक-एक विकेट लिए ।
यसअघि टस जितेर ब्याटिङ गरेको क्यानडाका लागि ओपनर नभ्नीत धलिवालले सर्वाधिक ४१ रन बनाए । उनले ३६ बलमा एक चौका र तीन छक्का प्रहार गरे । अविजित रहेका श्रेयस मोभाले १९ बलमा दुई चौका र तीन छक्कासहित ३८ रन जोडे ।
तेस्रो नम्बरमा आएका कनवरपाल तथगुरले २४ बलमा दुई चौका र एक छक्कासहित २५ रन बनाए । जसकरण सिंहले २१ रन जोडे भने निकोलस किर्टनले १० रन बनाए ।
नेपालका बलरमध्ये कुशल भुर्तेल र सन्दीप लामिछानेले समान दुई-दुई विकेट लिए । सोमपाल कामी र नन्दन यादवले एक-एक विकेट लिए ।
भारत र श्रीलंकाको संयुक्त आयोजनामा हुने टी-२० विश्वकपमा नेपालले फेब्रुअरी ८ मा इंग्ल्यान्डसँग खेल्दै आफ्नो अभियानको सुरुआत गर्नेछ ।
प्रतिक्रिया