सप्तरी । सप्तरीको रुपनी गाउँपालिका-६ स्थित दुधैला खोलामा शंकास्पद वस्तु विस्फोट हुँदा चार जना बालक घाइते भएका छन् ।
स्थानीयका अनुसार वनभोज खान खोलातर्फ गएका बालकहरूले खोलामा भेटिएको सकेट बमजस्तो देखिने शंकास्पद वस्तुलाई खेलौना ठानी दाउरासँगै जम्मा गरेर चुल्हो नजिक राखेका थिए । सोही क्रममा उक्त वस्तु अचानक विस्फोट भएको हो ।
विस्फोटमा परी सोही स्थानका साजन आले मगरका ११ वर्षीय छोरा साहस, मनोज थापा मगरका ९ वर्षीय छोरा प्राशिस, कर्णबहादुर थापा मगरका १६ वर्षीय छोरा कविर र पदमबहादुर विकका १३ वर्षीय छोरा सुरज घाइते भएका छन् ।
घाइते चारै जनालाई सुरुमा मधेश प्रदेश प्रहरी अस्पताल, रुपनीमा उपचार गरी थप उपचारका लागि छिन्नमस्ता अस्पताल, राजविराज लगिएको छ । घाइतेमध्ये साहस र प्राशिसको खुट्टा तथा शरीरका विभिन्न भागमा छर्रा लागेको छ भने कविर र सुरजको शरीरका विभिन्न भागमा चोट लागेको प्रहरीले जनाएको छ ।
घटनास्थल नेपाली सेनाको अभ्यास स्थल भएको र अभ्यासका क्रममा छुटेको वा विस्फोट हुन नसकी बाँकी रहेको शंकास्पद वस्तु विस्फोट भएको हुन सक्ने स्थानीयले आशंका गरेका छन् ।
बालकहरूले भेटेको उक्त शंकास्पद वस्तु तथा घटनाबारे थप अनुसन्धान भइरहेको जिल्ला प्रहरी कार्यालय सप्तरीका प्रवक्ता प्रहरी नायब उपरीक्षक (डीएसपी) डम्बरबहादुर पुरीले जानकारी दिए ।
प्रतिक्रिया