पश्चिम नवलपरासीमा रविको चुनावलक्षित कार्यक्रम रोक्न प्रशासनको निर्देशन

रुपन्देही । राष्ट्रिय स्वतन्त्र पार्टी (रास्वपा)का सभापति रवि लामिछानेले पश्चिम नवलपरासीमा आज मंगलबार गर्न लागेको चुनावलक्षित खुल्ला कार्यक्रम रोकिएको छ।

जिल्ला प्रशासन कार्यालय नवलपरासी (पश्चिम)ले निर्वाचन आचारसंहिता उल्लंघन हुनसक्ने भन्दै उक्त कार्यक्रमप्रति चासो राख्दै आचारसंहिता विपरीतका गतिविधि नगर्न र नगराउन निर्देशन दिएको हो।

सोमबार रुपन्देहीमा ‘रोड शो’ को नाममा गरिएको खुल्ला चुनावी गतिविधिपछि लामिछानेमाथि निर्वाचन आचारसंहिता उल्लंघनको आरोप लागेको थियो। सुप्रिम सहकारी ठगी, संगठित अपराध तथा सम्पत्ति शुद्धीकरणसम्बन्धी मुद्दामा तारिख बुझ्न जिल्ला अदालत रुपन्देही पुगेका अवसरमा उनले रुपन्देहीका विभिन्न स्थानमा पुगेर समर्थकहरूलाई सार्वजनिक स्थलमै सम्बोधन गरेका थिए। उस्तै प्रकृतिको कार्यक्रम मंगलबार पश्चिम नवलपरासीमा पनि तय भएपछि जिल्ला प्रशासन कार्यालय सक्रिय बनेको हो।

पश्चिम नवलपरासीका सहायक प्रमुख जिल्ला अधिकारी तथा निर्वाचन आचारसंहिता अनुगमन अधिकृत पोषण राजभण्डारीद्वारा जारी सूचनामा मिति २०८२ साल माघ २७ गते यस जिल्लामा हुने भनिएको कार्यक्रम निर्वाचन आचारसंहिता २०८२ अन्तर्गत पर्ने उल्लेख गर्दै आचारसंहिता विपरीतका गतिविधि नगर्नरनगराउन सबै सम्बन्धित पक्षलाई जानकारी गराइएको छ।

लामिछाने मंगलबार नवलपरासीको कार्यक्रममा सहभागी भई चितवन फर्कने कार्यक्रम बनाएका थिए।