सल्यान । सल्यानको कपुरकोट गाउँपालिका-३ चोरखोला नजिक पिकअप जिप दुर्घटना हुँदा एक जनाको मृत्यु भएको छ भने आमा-छोरीसहित तीन जना घाइते भएका छन्।
बुधबार बिहान करिब साढे ५ बजे रुकुम पूर्वबाट राप्ती लोकमार्ग हुँदै दाङको तुलसीपुरतर्फ आउँदै गरेको ग १ ज ५६६१ नम्बरको पिकअप जिप सडकबाट करिब २ सय ५० मिटर तल भीरमा खसेको जिल्ला प्रहरी कार्यालय सल्यानले जनाएको छ।
जिल्ला प्रहरी कार्यालय सल्यानकाका अनुसार दुर्घटनामा जिप चालक रुकुम पूर्वको सिस्ने गाउँपालिका-४ अमलाचौर निवासी ३० वर्षीय विजय विश्वकर्माको घटनास्थलमै मृत्यु भएको हो।
दुर्घटनामा सिस्ने गाउँपालिका-४ की ३८ वर्षीया ललिता केसी, सिस्ने-२ की २२ वर्षीया सुष्मी रोका र उनकी २ वर्षीया छोरी सफलता केसी घाइते भएका छन्। घाइतेमध्ये ललिताको अवस्था मध्यम रहेको छ भने आमा र छोरीको अवस्था सामान्य रहेको प्रहरीले जनाएको छ।
घाइते सबैलाई कपुरकोटमा प्रारम्भिक उपचारपछि थप उपचारका लागि दाङको तुलसीपुरस्थित राप्ती प्रादेशिक अस्पतालमा रिफर गरिएको छ।
दुर्घटनाको क्रममा आमा र छोरी जिपबाट हुत्तिएर सडकमा खसेकाले जोगिएका हुन्। ललिता केसी भने करिब २० मिटर तल भीरमा पुगेकी थिइन्। मृतक चालक जिपसँगै तल खसेका थिए।
घटनाबारे अनुसन्धान भइरहेको प्रहरीले जनाएको छ।
प्रतिक्रिया