काठमाडौं । महाशिवरात्री पर्वको सुरक्षाका लागि पशुपतिनाथ मन्दिर क्षेत्रमा खटिएका प्रहरीमाथि आक्रमण गर्ने एक युवकलाई प्रहरीले पक्राउ गरेको छ ।
पक्राउ पर्नेमा मकवानपुरको ठुलदमार स्थायी घर भई हाल काठमाडौं महानगरपालिका-१३, चागल बस्ने २५ वर्षीय रिजन श्रेष्ठ रहेका छन् । उनलाई जिल्ला प्रहरी परिसर काठमाडौंले पक्राउ गरेको जनाएको छ ।
प्रहरीका अनुसार श्रेष्ठले ड्युटीमा खटिएका एक प्रहरीलाई लात्ती प्रहार गर्दै छातीमा आक्रमण गरेका थिए । उक्त घटनाको भिडियो सामाजिक सञ्जालमा सार्वजनिक भएपछि व्यापक रूपमा भाइरल बनेको थियो ।
यसअघि मंगलबार जिल्ला प्रहरी परिसर काठमाडौंले एक सूचना जारी गर्दै प्रहरीमाथि आक्रमण गर्ने व्यक्तिको पहिचानका लागि सर्वसाधारणसँग सहयोगसमेत माग गरेको थियो । सोही आधारमा अनुसन्धान अघि बढाउँदै प्रहरीले आक्रमणमा संलग्न युवकलाई पक्राउ गर्न सफल भएको जनाएको छ ।
प्रतिक्रिया