काठमाडौं । नेपालमा आज ७६ औँ राष्ट्रिय प्रजातन्त्र दिवस विभिन्न कार्यक्रम आयोजना गरी मनाइँदै छ । दिवसका अवसरमा मूल समारोह समितिको आयोजनामा टुँडिखेलस्थित सैनिक मञ्चमा विशेष समारोह आयोजना गरिएको छ, जसमा रामचन्द्र पौडेल सहभागी हुने कार्यक्रम तय भएको छ ।
समारोहलाई प्रधानमन्त्री सुशीला कार्कीले सम्बोधन गर्ने कार्यक्रम रहेको छ । प्रजातन्त्र दिवसका अवसरमा सरकारले देशभर सार्वजनिक बिदासमेत दिएको छ । नेपालको इतिहासमा २००७ साल फागुन ७ गते जहानियाँ राणा शासनको अन्त्य भई प्रजातन्त्र स्थापना भएको गौरवपूर्ण दिनका रूपमा स्मरण गरिन्छ ।
प्रजातन्त्र स्थापनाका लागि भएको संघर्षका क्रममा शुक्रराज शास्त्री, दशरथ चन्द, धर्मभक्त माथेमा र गंगालाल श्रेष्ठले १९९७ माघमा बलिदान दिएका थिए। उनीहरूले प्रजापरिषद् नामक राजनीतिक संगठनमार्फत प्रजातन्त्र स्थापनाको अभियान सञ्चालन गरेका थिए ।
२००६ सालमा नेपाली कांग्रेस गठन भएपछि संस्थापक नेता बीपी कोइरालाको नेतृत्वमा सशस्त्र तथा निर्णायक आन्दोलन सञ्चालन गरिएको थियो । सोही आन्दोलनको परिणामस्वरूप २००७ साल फागुन ७ गते प्रजातन्त्र स्थापना भएको घोषणा गरिएको थियो । तत्कालीन राजा त्रिभुवनको घोषणापछि राणा र नेपाली कांग्रेस सम्मिलित सरकार गठन भई नेपालमा प्रजातान्त्रिक शासन व्यवस्थाको सुरुआत भएको थियो ।
प्रजातन्त्र स्थापनापछि विभिन्न राजनीतिक आन्दोलन र जनसंघर्षमार्फत नेपालमा लोकतन्त्र हुँदै संघीय लोकतान्त्रिक गणतन्त्रात्मक शासन व्यवस्था स्थापना भएको छ । प्रजातन्त्र दिवसले सहिदहरूको बलिदान, जनसंघर्ष र लोकतान्त्रिक मूल्य तथा मान्यताको सम्मान गर्ने अवसरका रूपमा विशेष महत्व राख्दछ ।
दिवसका अवसरमा राष्ट्रपति रामचन्द्र पौडेलले शुभकामना सन्देश जारी गर्दै मुलुकको सार्वभौमसत्ता जनतामा निहित हुने मान्यता सहिदहरूको बलिदान र जनआन्दोलनबाट स्थापित भएको उल्लेख गरेका छन् । नेपालमा हरेक वर्ष फागुन ७ गते प्रजातन्त्र दिवस, वैशाख ११ गते लोकतन्त्र दिवस र जेठ १५ गते गणतन्त्र दिवस औपचारिक रूपमा मनाउने गरिएको छ ।
प्रतिक्रिया