काठमाडौं । काठमाडौंको बसन्तपुर दरबार क्षेत्रमा रङ्गीचङ्गी ध्वजाले सजाइएको तीनतले चीर ठड्याइएसँगै रङ्गहरूको पर्व होली औपचारिक रूपमा सुरु भएको छ ।
परम्पराअनुसार फागुन शुक्ल अष्टमीका दिन बसन्तपुरस्थित हनुमानढोका दरबारको गद्दी बैठकको दक्षिणतर्फ चीर ठड्याएपछि देशभर फागु अर्थात् होली पर्व सुरु भएको मानिन्छ । सोही परम्परा अनुसार मंगलबार बिहान मानन्धर समुदायले रङ्गीचङ्गी ध्वजासहितको चीर ठड्याउँदै होलीको सुरुआत गरेका हुन् । उनीहरूले एकअर्कालाई अबिर दल्दै पर्व सुरु भएको सन्देश समेत दिएका थिए ।
यसै अवसरमा पशुपतिनाथ मन्दिर, हनुमानढोका दरबारको सुन्दरीचोक तथा कृष्ण मन्दिर परिसरमा पनि रङ्गीचङ्गी कपडाका टुक्रा झुण्ड्याएर होली प्रारम्भ भएको जनाउने परम्परा निभाइएको छ ।
यस वर्ष होली पर्वको मुख्य दिन फागुन १८ गते हिमाली तथा पहाडी जिल्लामा र फागुन १९ गते तराईरमधेशका जिल्लामा परेको छ । यी दिनहरूमा सम्बन्धित क्षेत्रमा सार्वजनिक बिदा समेत दिइएको छ ।
बसन्तपुर दरबार क्षेत्रमा चीर ठड्याइएको अवसरमा नेपाली सेनाको टोलीले मंगलधुन बजाउनुका साथै बन्दुक पड्काएर हर्षोल्लास व्यक्त गरेको थियो । चीर ठड्याइएको दृश्य अवलोकन गर्न स्थानीयवासीको उल्लेख्य उपस्थिति रहेको थियो । सहभागीहरूले एकअर्कालाई अबिर दल्दै होलीको खुसी साटासाट गरेका थिए ।
प्रतिक्रिया