काठमाडौं । पश्चिम एशियामा विकसित हुँदै गएको सुरक्षा अवस्था र इजरायल-इरानबीच बढ्दो द्वन्द्वलाई मध्यनजर गर्दै नेपाल सरकारको परराष्ट्र मन्त्रालयले ट्राभल एड्भाइजरी जारी गरेको छ।
मन्त्रालयले पश्चिम एशियाको परिस्थितिलाई नजिकबाट अनुगमन गरिरहेको जनाउँदै विशेषगरी इजरायल र इरानमा रहेका नेपाली नागरिकलाई उच्च सतर्कता अपनाउन आग्रह गरेको हो।
जारी सूचनामा इजरायल र इरानमा बसोबास गरिरहेका नेपालीहरूलाई सम्बन्धित देशका आधिकारिक निकायहरूले जारी गरेका सुरक्षा निर्देशनहरूको कडाइका साथ पालना गर्न अनुरोध गरिएको छ। सकेसम्म घरभित्रै बस्न, अनावश्यक आवतजावत नगर्न, उच्च सतर्कता अपनाउन तथा आफू बसोबास गर्ने स्थानका नेपाली समुदायसँग नियमित सम्पर्कमा रहन मन्त्रालयले सुझाएको छ।
त्यस्तै, सम्बन्धित निकायको पूर्वस्वीकृतिबिना कुनै पनि यात्रा नगर्न स्पष्ट निर्देशन दिइएको छ। मन्त्रालयले काठमाडौंस्थित परराष्ट्र मन्त्रालय, तेल अविवस्थित नेपाली दूतावास तथा दोहास्थित नेपाली दूतावाससँग नियमित सम्पर्कमा रहन पनि आग्रह गरेको छ।
यसैबीच, इजरायल वा इरान भ्रमण गर्ने योजना बनाएका नेपाली नागरिकलाई हालको अवस्था सामान्य नभएसम्म यात्रा स्थगित गर्न कडा सल्लाह दिइएको छ। साथै, अन्य मध्यपूर्वी देशहरूमा बसोबास तथा रोजगारीमा रहेका नेपालीहरूलाई पनि त्यहाँका सम्बन्धित निकायहरूले जारी गरेका सुरक्षा उपायहरूको पालना गर्दै पछिल्ला घटनाक्रमहरू निरन्तर निगरानी गर्न मन्त्रालयले अपिल गरेको छ।
परराष्ट्र मन्त्रालयले क्षेत्रीय अवस्थाको संवेदनशीलतालाई ध्यानमा राख्दै नेपाली नागरिकको सुरक्षालाई सर्वोच्च प्राथमिकतामा राखिएको जनाएको छ।
प्रतिक्रिया