काठमाडौं । नेपाल जेनजी फ्रन्टकी संयोजक रक्षा बमले आन्दोलनका क्रममा भएका घटनाहरूको सत्यतथ्य छानबिन प्रतिवेदन सार्वजनिक गर्न पुनः सरकारको ध्यानाकर्षण गराएकी छन् ।
सामाजिक सञ्जालमार्फत प्रधानमन्त्री सुशीला कार्कीलाई सम्बोधन गर्दै उनले आफू र आफूजस्ता युवामाथि लागेका गम्भीर आरोपहरूको जवाफ प्रतिवेदन सार्वजनिक गरेर दिन माग गरेकी हुन् ।
जेन-जेड आन्दोलनका घाइतेका परिवारमाथि माइतीघरमा भएको दुर्व्यवहारको भिडियो सामाजिक सञ्जालमा भाइरल भएपछि बमले पुनः प्रतिवेदन सार्वजनिक गर्न आग्रह गरेकी हुन् ।
उनले प्रधानमन्त्रीलाई सम्बोधन गर्दै प्रतिवेदन सार्वजनिक गर्नु सरकारको जिम्मेवारी भएको उल्लेख गरेकी छन् । साथै, आफूविरुद्ध उठेका आरोप–प्रश्नहरूको स्पष्ट उत्तर आवश्यक रहेको बताएकी छन् ।
बमले आन्दोलनका क्रममा भएका घटनाबारे सत्यतथ्य जान्न चाहेको उल्लेख गर्दै आफ्नो संलग्नताबारे पनि स्पष्ट हुन खोजेकी छन् । उनले आन्दोलन शान्तिपूर्ण हुँदाहुँदै हिंसात्मक कसरी बन्यो, गोली चलाउने आदेश कसले दियो र सिंहदरबारमा आगजनी कसरी भयो भन्ने विषयमा पनि छानबिन प्रतिवेदनमार्फत सत्य सार्वजनिक हुनुपर्ने माग राखेकी छन् ।
उनले माइतीघरमा भएको दुर्व्यवहारलगायत घटनाबारे आफूले बारम्बार स्पष्टीकरण दिइसकेको भए पनि अब त्यसले मात्रै नपुग्ने भन्दै सरकारले औपचारिक रूपमा प्रतिवेदन सार्वजनिक गर्नुपर्नेमा जोड दिएकी छन् ।
प्रतिक्रिया