काठमाडौं । नेपाली राष्ट्रिय महिला फुटबल टोलीकी कप्तान सावित्रा भण्डारी ‘साम्बा’को घुँडाको शल्यक्रिया सफलतापूर्वक सम्पन्न भएको छ । बुधबार (चैत ११) बिहान डा. साइमन र उनको टोलीले अकल्यान्ड मा शल्यक्रिया सम्पन्न गरेको जानकारी भण्डारीले आफ्नै सामाजिक सञ्जालमार्फत दिएकी छन् ।
“लामो प्रतिक्षापछि अन्ततः मेरो घुँडाको शल्यक्रिया सम्पन्न भएको छ । डा. साइमन र उनको टोलीबाट अकल्यान्डमा सफलतापूर्वक शल्यक्रिया गरिएको जानकारी गराउँदछु,” उनले लेखेकी छन् ।
खाडी क्षेत्रमा हालको असहज परिस्थितिका कारण कतारस्थित एस्पेटार पुग्न कठिन भएपछि न्युजिल्यान्डमै उपलब्ध विशेषज्ञमार्फत शल्यक्रिया गरिएको उनले उल्लेख गरेकी छन् ।
अब भोलिदेखि त्यहीँका चिकित्सकको निगरानीमा पुनर्स्थापन (रिह्याब) प्रक्रिया सुरु हुने र अवस्था सामान्य भएपछि एस्पेटारमै पुनः रिह्याबलाई निरन्तरता दिने योजना रहेको उनले बताएकी छन् ।
प्रतिक्रिया