काठमाडौं । साफ यू-२० च्याम्पियनसिप अन्तर्गत नेपाल यू-२० फुटबल टोलीले आज (चैत ११) श्रीलंका यू-२० फुटबल टोलीसँग प्रतिस्पर्धा गर्दैछ । दुवै टोली लगातार दोस्रो जितको खोजीमा मैदान उत्रँदै छन् ।
समूह ‘ए’ मा रहेको नेपाल एक खेलबाट ३ अंक जोड्दै तालिकाको दोस्रो स्थानमा छ । नेपालले उद्घाटन खेलमा भुटान यू-२० फुटबल टोलीलाई २-१ ले पराजित गरेको थियो ।
यता, श्रीलंका समान खेलबाट ३ अंकसहित समूहको शीर्ष स्थानमा छ । श्रीलंकाले आफ्नो पहिलो खेलमा आयोजक माल्दिभ्स यू-२० फुटबल टोलीलाई ३-२ ले हराएको थियो ।
नेपाल र श्रीलंकाबीचको खेल राष्ट्रिय फुटबल रंगशाला, मालेमा नेपाली समयअनुसार साँझ ६ बजे सुरु हुनेछ ।
आजै हुने अर्को खेलमा समूह ‘ए’ कै भुटान र माल्दिभ्स पहिलो जितको खोजीमा आमनेसामने हुँदैछन् । दुवै टोली पहिलो खेलमा पराजित भएका कारण अंकविहीन अवस्थामा तालिकाको पुछारमा छन् ।
भुटान र माल्दिभ्सबीचको खेल पनि सोही रंगशालामा नेपाली समयअनुसार राति ९:४५ बजे हुने तालिका रहेको छ ।
प्रतिक्रिया