काठमाडौं । नेकपा (एमाले) ले संसद बैठकको पहिलो दिनमै सत्तारुढ दल र सरकारप्रति आक्रोश व्यक्त गरेको छ ।
बिहीबार प्रतिनिधिसभाको बैठकलाई सम्बोधन गर्दै एमाले संसदीय दलका नेता रामबहादुर थापाले भदौ २३ र २४ को विध्वंस गर्न रास्वपाको संलग्नता रहेको आरोप लगाए । उनले सेना, कर्मचारीतन्त्र, टीओबी, बारबरा फाउन्डेसन, सुशीला कार्की सरकार, विदेशी शक्तिकेन्द्र लगायतका विभिन्न शक्तिले चुनावमा निलो क्रान्तिलाई अनुमोदन गराउने षड्यन्त्र गरेको आरोप समेत लगाए ।
“रास्वपाको अघोषित रंग क्रान्ति भदौ २३ र २४ मा सफलतापूर्वक गरियो। फागुन २१ गते आम निर्वाचनमार्फत निलो क्रान्ति सम्पन्न गरियो,” उनले व्यंगात्मक शैलीमा भने, “चैत १३ गते भव्य धार्मिक अनुष्ठानसहित प्रधानमन्त्री नियुक्त गरियो। नेकपा एमालेको तर्फबाट यो अभूतपूर्व विजयी बधाई भन्न चाहन्छु।”
थापाले पूर्वप्रधानमन्त्री केपी शर्मा ओली र पूर्वगृहमन्त्री रमेश लेखकलाई पक्राउ गरिएको घटनाप्रति कडा आपत्ति पनि जनाए। उनले उनीहरूलाई गैरकानूनी ढंगबाट पक्राउ गरिएको दाबी गर्दै त्यसप्रति विरोध व्यक्त गरे।
“समृद्धिका नायकहरूलाई खलनायक र हत्यारोको रूपमा स्थापित गर्न खोजिएको छ,” उनले भने, “देश जलाउनेहरूलाई महानायक बनाइएको छ।”
थापाले राजनीतिक नेतृत्वलाई पक्राउ गर्ने प्रयास किन भइरहेको भन्दै सरकारसँग प्रश्न उठाए। “कुन उद्देश्य पूरा गर्नका लागि राजनीतिक नेतृत्वहरूलाई पक्राउ गर्ने प्रपञ्च रचिँदैछ ? किन देशव्यापी रूपमा दमनचक्र र राज्य आतङ्क मच्चाइँदैछ ?” उनले प्रश्न गरे।
त्यसैगरी, उनले भदौ २३ र २४ गतेको घटनाबारे स्पष्टता माग्दै विद्यार्थी सङ्गठनहरू खारेज गर्ने सरकारको तयारीप्रति पनि असन्तुष्टि व्यक्त गरे।
प्रतिक्रिया