भक्तपुर । भक्तपुरमा नौ दिन आठ रातसम्म मनाइने प्रसिद्ध बिस्का: (बिस्केट) जात्रा आजदेखि सुरु भएको छ । नेपाली नयाँ वर्ष वैशाख १ भन्दा चार दिनअघि भैरव र भद्रकालीको रथ तानेर सुरु हुने यो जात्रा वैशाख ५ गतेसम्म सञ्चालन हुने गर्दछ ।
लिच्छविकालदेखि चलिआएको मानिने यो जात्रा भक्तपुरको सांस्कृतिक तथा ऐतिहासिक पहिचानसँग जोडिएको छ । तौमढीस्थित पाँचतले मन्दिर अगाडिबाट भैरव र भद्रकालीको रथ तानेर जात्रा सुरु गरिएको हो ।
जात्राको मुख्य आकर्षण भैलखः (रथ) तानातान हो, जसमा क्वने (तल्लो टोल) र थने (माथिल्लो टोल) का बासिन्दाले आ-आफ्नो टोलतर्फ रथ तान्ने प्रतिस्पर्धा गर्छन् । पहिलो दिन रथलाई विभिन्न परम्परागत मार्ग हुँदै घुमाइ गःहिटीमा ल्याइन्छ ।
दोस्रो दिनलाई शून्य दिनका रूपमा मनाइन्छ भने तेस्रो दिन गःहिटीमा भैरवनाथलाई राँगो बलि चढाई विशेष पूजा गरिन्छ । चौथो दिन तालाक्वस्थित कुमाले टोलमा यसींद्योः (लिङ्गो) उभ्याउने कार्यक्रम हुन्छ, जुन पुरानो वर्षको विदाइ र नयाँ वर्षको स्वागतको प्रतीक मानिन्छ ।
वैशाख १ गते बिहानदेखि चुपिङघाट र ल्यसिङखेल क्षेत्रमा भक्तजनको भीड लाग्ने गर्दछ । सो दिन यसींद्योः ढाल्ने तथा भैरव र भद्रकालीको रथ जुधाउने ‘द्योः ल्वाकिगु’ जात्रा मनाइन्छ ।
त्यसपछि क्रमशः महाकाली, महालक्ष्मी, ब्रम्हायणी, महेश्वरीलगायत देवदेवीका विभिन्न जात्रा सञ्चालन हुन्छन् । आठौँ दिन सगुन जात्रा मनाइने र अन्तिम दिन पुनः भैलखः तानातानसहित जात्रा सम्पन्न गरिने परम्परा रहेको छ ।
जात्रा अवधिभर सुरक्षा व्यवस्था कडा पारिएको स्थानीय प्रशासनले जनाएको छ ।
प्रतिक्रिया