काठमाडौं । नेपालमा हाल पश्चिमी तथा स्थानीय वायुको आंशिक प्रभावका कारण मौसममा परिवर्तन देखिएको छ । मौसम पूर्वानुमान महाशाखाका अनुसार देशका हिमाली क्षेत्रमा सामान्य बदली तथा पहाडी भूभागमा आंशिक बदली रहेको छ ।
तराईका अधिकांश जिल्लामा मौसम मुख्यतया सफा रहेको छ । कोशी प्रदेशका पहाडी क्षेत्रका केही स्थानमा हाल हल्का वर्षा तथा हिमपात भइरहेको महाशाखाले जनाएको छ ।
आज बिहीबार कोशी प्रदेशका पहाडी भूभाग तथा बागमती र गण्डकी प्रदेशका हिमाली क्षेत्रमा सामान्य बदली रहनेछ भने अन्य पहाडी तथा हिमाली भूभागमा आंशिक बदली रहने सम्भावना रहेको छ । तराई क्षेत्रमा भने मौसम मुख्यतया सफा रहनेछ ।
महाशाखाका अनुसार कोशी प्रदेशका पहाडी तथा हिमाली क्षेत्रका थोरै स्थानमा मेघगर्जन तथा चट्याङसहित हल्का वर्षा र हिमपातको सम्भावना रहेको छ । त्यस्तै, बागमती र गण्डकी प्रदेशका हिमाली भूभागका एक-दुई स्थानमा पनि हल्का हिमपात हुन सक्ने अनुमान गरिएको छ ।
समग्रमा तराई क्षेत्रमा मौसम स्थिर रहने भए पनि पहाडी र हिमाली भूभागमा आंशिक बदलीसँगै हल्का वर्षा तथा हिमपातको क्रम जारी रहने देखिएको छ ।
प्रतिक्रिया