काठमाडौं । सर्वोच्च अदालतले पूर्वऊर्जा मन्त्री तथा कांग्रेस नेता दीपक खड्का लाई थुनामुक्त गर्न आदेश दिएको छ।
कामु प्रधानन्यायाधीश सपना प्रधान मल्ल र न्यायाधीश श्रीकान्त पौडेल को संयुक्त इजलासले बन्दीप्रत्यक्षीकरण रिटमा सुनुवाइ सम्पन्न गरेपछि उक्त आदेश जारी गरेको हो।
सम्पत्ति शुद्धीकरणको आरोपमा पक्राउ परेका खड्का प्रहरी हिरासतमा रहेका थिए। तर, सर्वोच्चले उनको थुना कानुनसम्मत नभएको ठहर गर्दै रिहा गर्न आदेश दिएको हो।
यद्यपि, अदालतले खड्कालाई विदेश यात्रा गर्नुअघि अनिवार्य रूपमा अदालतको अनुमति लिनुपर्ने शर्त समेत तोकेको छ। साथै, पूर्व नजिरलाई आधार मान्दै उक्त अभियोगमा मिलापत्रको सम्भावना रहेको पनि आदेशमा उल्लेख गरिएको छ।
यसअघि सर्वोच्चले ललितपुर जिल्ला अदालतबाट म्याद थपका लागि तयार गरिएको पर्चा, राजस्व अनुसन्धान विभागको अनुरोधपत्र तथा थुनासम्बन्धी कारणसहितको लिखित जवाफ पेश गर्न आदेश दिएको थियो।
खड्काको रिहाइका लागि उनकी पत्नी बिनिता थापा ले बन्दीप्रत्यक्षीकरण रिट दायर गरेकी थिइन्। उनलाई केन्द्रीय अनुसन्धान ब्युरो सीआईबीको टोलीले चैत १५ गते पक्राउ गरेको थियो।
प्रतिक्रिया