काठमाडौं । सम्पत्ति शुद्धीकरणको अनुसन्धानमा रहेका व्यवसायी दीपक भट्ट र सुलभ अग्रवाललाई थप सात दिन हिरासतमा राख्न अदालतले अनुमति दिएको छ।
बुधबार काठमाडौं जिल्ला अदालतका न्यायाधीश तिलकबहादुर कार्कीको इजलासले अनुसन्धानका लागि उनीहरूलाई सात दिन हिरासतमा राख्न म्याद थप गरेको हो।
सम्पत्ति शुद्धीकरण (मनी लाउण्डरिङ) निवारण ऐन, २०६४ को दफा १७ को उपदफा (४) बमोजिम दुवैजनामाथि थप अनुसन्धान गर्न सो म्याद थप गरिएको हो।
अनुसन्धान गरिरहेको निकायले भने उनीहरूलाई ३० दिनसम्म हिरासतमा राख्न अनुमति मागेको थियो। विभागले अनुसन्धान अन्तिम चरणमा पुगेको उल्लेख गर्दै सम्पत्ति शुद्धीकरणसँग सम्बन्धित बीमा ऐन र धितोपत्र ऐनसँग जोडिएका कसुरमाथि पनि अनुसन्धान भइरहेको जनाएको छ।
राय प्रतिवेदन तयार पार्न थप समय आवश्यक परेको भन्दै विभागले म्याद थप माग गरेको थियो, जसअनुसार अदालतले सात दिनको अनुमति दिएको हो।
प्रतिक्रिया