बुटवल । पाल्पाको बगनासकाली गाउँपालिका-२ की २९ वर्षीया गीता पाण्डेको गर्भपतनका क्रममा भएको मृत्युमा चिकित्सकीय लापरवाही भएको निष्कर्ष निकालिएको छ । घटनाको छानबिन गर्न गठित नेपाल मेडिकल काउन्सिल ले शनिबार २६ पृष्ठ लामो प्रतिवेदन सार्वजनिक गर्दै उपचार प्रक्रियामा गम्भीर त्रुटि भएको ठहर गरेको हो ।
प्रतिवेदनका आधारमा काउन्सिलले संलग्न चिकित्सक डा. शतिस रूपाखेतीलाई तत्कालका लागि निलम्बन गर्ने निर्णय गरेको छ । निलम्बनपछि उनले केही समय चिकित्सकीय अभ्यास गर्न नपाउनेछन् ।
यसैगरी उपचारमा संलग्न जोनल हेल्थ क्लिनिक र इन्दूशिला स्वास्थ्य क्लिनिकलाई बन्द गराउन सम्बन्धित प्रहरी तथा प्रशासनलाई पत्राचार गर्ने निर्णय पनि गरिएको छ । काउन्सिलका रजिष्ट्रार सतिशकुमार देवले घटनाले आमाहरूको स्वास्थ्य सुरक्षामाथि गम्भीर प्रश्न उठाएको भन्दै यस्ता घटना दोहोरिन नदिन कडाइका साथ अनुगमन गरिने बताए ।
घटनासम्बन्धी अनुसन्धानका क्रममा निलम्बित डा. रूपाखेतीसहित पाँच जनालाई मृतकका श्रीमान् प्रकाश पाण्डेको जाहेरीका आधारमा प्रहरीले पक्राउ गरिसकेको छ । छानबिन समिति काउन्सिलका सदस्य सम्राट पराजुलीको संयोजकत्वमा गठन गरिएको थियो ।
पाण्डेको पेटमा करिब १२ हप्ताको गर्भ रहेको अवस्थामा गर्भ असामान्य भएको भन्दै बुटवलस्थित खत्री नर्सिङ होम, जोनल फार्मेसी र इन्दुलेखा क्लिनिकमार्फत गर्भपतन गराउने क्रममा गत आइतबार उनको मृत्यु भएको थियो ।
पाल्पा घर भए पनि हाल रूपन्देहीको तिलोत्तमा नगरपालिका-३ मा बस्दै आएकी पाण्डेको शव छानबिन प्रतिवेदन सार्वजनिक भएपछि परिवारले बुझेका छन् । पीडित परिवारले उपचारमा संलग्न सबै चिकित्सक र स्वास्थ्यकर्मीमाथि कानुनअनुसार कडा कारबाहीको माग गर्दै आएका छन् ।
प्रतिक्रिया