काठमाडौं । नेपाली कांग्रेसका निवर्तमान कार्यवाहक सभापति पूर्णबहादुर खड्काले आज आफ्नो समूहको बैठक बोलाएका छन् ।
बैठकमा समूहका शीर्ष नेता, १४ औँ महाधिवेशनबाट निर्वाचित केन्द्रीय सदस्य, जिल्ला सभापतिहरू तथा उपत्यकामा उपलब्ध क्षेत्रीय सभापतिहरूलाई सहभागी हुन आह्वान गरिएको छ ।
नेताहरूका अनुसार बैठक बिहान ११ बजे धुम्बाराहीस्थित होटल स्मार्टमा बस्नेछ । यसअघि वैशाख ६ गते यही स्थानमा आयोजित भेलाले ‘पर्ख र हेर’ को रणनीति अपनाउने निष्कर्ष निकालेको थियो ।
विशेष महाधिवेशनबाट गगन थापा नेतृत्वमा पार्टी पुनर्गठन भएपछि खड्का असन्तुष्ट रहँदै आएका छन् । उनले उक्त महाधिवेशन खारेजको माग गर्दै सर्वोच्च अदालतमा रिट दायर गरेका थिए । तर सर्वोच्च अदालतले रिट खारेज गर्दै थापा नेतृत्वको कांग्रेसलाई मान्यता दिएको थियो ।
त्यसपछि पनि खड्काले आफ्ना समर्थक नेताहरूसँग निरन्तर बैठक र छलफल जारी राख्दै आएका छन् । उनको गतिविधिलाई संस्थापन पक्षले अनुशासनविपरीत भन्दै स्पष्टीकरण सोधेको थियो, तर खड्काले त्यसको जवाफ नदिएको जनाइएको छ ।
यसैबीच, सभापति गगन थापा वैशाख ६ गते गोल्फुटारस्थित खड्का निवास पुगेर भेटघाट गरेका थिए । दुई नेताबीच भएको उक्त भेटवार्ताबारे भने हालसम्म सार्वजनिक रूपमा कुनै विवरण बाहिर आएको छैन ।
प्रतिक्रिया